1800/2025-2026

Aizawl the 22nd August 2025: Vawiin khan Mizoram State Policy Coordination Committee te chu an chairman Pu Lalduhoma, Chief Minister hovin CM Conference Hall-ah an thukhawm a. Pilot phase-a an hmalak tawh chinte thlirletin, second phase atana inbuatsaihna an nei. Second phase hi September ni 20 atanga dilna thehluh theih beisei.

Pilot phase Loan component-ah khan dilna 11,439 a lut a, pawmsak (approved), loan pek theih hi 668 niin, endik leh deuh hlek ngai 62 an la awm. Chuvang chuan pilot phase a dawng tur zat hi a la danglam thei. A diltute DPR siamsak tur MKVIB a thawn mek zat hi 58 a awm bawk.

Dr. KC Lalmalsawmzauva, Adviser to CM chuan phase 2 atana inbuatsaihna tlangpui a sawifiah a. Bana Kaih Loan Component Software thar duan a ni a. A diltuin, software-in a mamawh data-te a dahluh kim chuan software khan DPR a rawn siam chhuak (generate) thei a. DPR siam leh endikna lama hun rei tak hman ngai thin a titawi hle tawh tura ngaih a ni.

An dil tur trade a zirin application form hrang chi 5 siam a ni tawh ang a, MKVIB chu line department pakhat anga kaltir ve tawh tur a ni.

Chief Minister's Special Package hi chu a diltuin online-in a submit thei ang a, Common Service Centre atang pawhin a thehluh theih ang a, hard copy pawha thehluh theih a ni ang. A dilna hi DC office-ah chauh ni lovin BDO Office-ah pawh thehluh theih tura ruahman a ni. Chhungkaw khat atanga pakhat aia tamin an dil loh nan ruahmanna siam a ni.

Second phase atanga a dilna portal thar kalpui a nih dawn avang leh a dilna form pawh a danglam dawn tak avangin, a diltuten a thara dil vek tur a ni a, September ni 20, 2025 atanga dilna hi thehluh tan theih beisei a ni. Tin, dilna hi nghahkhawl a ni tawh dawn lo va, a lut apiang kha endik nghal zel tawh tur a ni.

A endik (monitoring) dan kalphung pawh siam that a ni a, awareness campaign zau taka kalpui tur a ni bawk ang.

Meeting-ah hian member te an kal tha hle.