Chief Minister Pu Lal Thanhawla hma lakna leh Trade & Commerce Minister Pu Lalrinliana Sailo sawmna ngai pawimawhin Bangladesh Minister for Chittagong Hill Tracts Affairs Pu Dipankar Talukdar chuan December ni 7 -10, 2011 hian Mizoram a rawn tlawh dawn a. Bangladesh Prime Minister Office - Deputy Secretary (Director), Chittagong Hill Tracts a Deputy Secretary te bakah official dang paruk (6) ten an rawn tawiawm dawn a ni.

Bangladesh Minister hian December ni 8 ah Lunglei a tlawh ang a, a tuk ni 9 December ah Tlabung-ah Trade Facilitation Centre building Trade & Commerce Department-in a sak zawh hlim chu Trade & Commerce Minister Pu Lalrinliana Sailo nen an hawng ang a. Hemi zawh ah Kawrpuichhuah Integrated Check Post tur hmun tlawh lehin, lungphum an phum ang. Chawngte ah an kal leh ang. December ni 10 ah Chawngte atanga chhuakin Lunglei ah Mizoram sorkar hruaitu pawimawhte nen inkawmin Aizawl ah an rawn kir leh dawn a ni.

Bangladesh Minister pual hian Trade & Commerce Minister Pu Lalrinliana Sailo chuan Aizawl ah Zanriah a buatsaih sak ang a, Mizoram Chief Minister Pu Lal Thanhawla nen pawh inkawmna hun an neih beisei a ni a, ruahman dan ang chuan ni 11.12.2011 ah Bangladesh pan a kir leh tur a ni.

Hetianga ram thenawm Minister meuh in Mizorama hun a rawn hman tur hi ram pahnih inlaichinna tinghettu leh a bik takin Mizoram tana sumdawnna kawng a hmathar kaina hun remchang tak a nih a beiseiawm hle a ni.