Mizoram rawn tlawh mektu State Minister of Chittagong Hill Tract Affairs, Bangladesh Pu Dipankar Talukdar chuan nimin leh vawiin hian Mizoram khawthlang lama Chakma awmna hmun te a tlawh. December ni 8, 2011 (Ningani) a Mizoram Chief Minister Pu Lal Thanhawla nen an inkawm hnu in Lunglei lam panin a chhuak a, Lungleiah hian Pu Joseph Lalhimpuia Vice-Chairman, HPC Lunglei, Lunglei DC Pu V. Sapchhunga leh Pu Lallianmawia, Lunglei SP bakah mipawimawh engemaw zatin an lo hmuak a, Pu R.Selthuama, MLA NLUP Implementing Board Chairman pawh Lungleia a awm remchan lai a ni a, Circuit House a Minister hmuahna ah a tel ve bawk a ni. Minister hi Aizawl atangin Pu Lal Rinliana Sailo, Trade & Cmmerce Minister leh Pu S.Laldingliana, Parliamentary Secretary te nen an kal ho a ni.

Pu Talukdar-a hian nimin chhun khan Tlabung tlawhin Mizoram Sawrkarin Trade Facilitation Centre a sak chu Pu Lal Rinliana Sailo, Trade & Commerce Minister nen an hawng dun a, hemi hnu hian lawnglenga chuangin Kawrpuichhuaha inthianthatna lungphum “India-Bangladesh Shared Vision of Peace, Prosperity and Partnership” lungphum chu an hawng dun bawk a, hemi hnu hian Pu Talukdar hian Kawrpuichhuah BSF Camp a Lunglei Civil Hospital a thawktu ten Free Medical Camp an buatsaih chu a hawng nghal bawk a ni. Hemi hnu hian Trade & Commerce Minister Pu Lal Rinliana Sailo nen Kawrpuichhuaha Border Fencing te an en dun nghal bawk a ni.

Tlabung atang hian Pu Talukdar hian Chawngte a pan a,Chawngte thlen hma chakma khaw tinah mipuiten parthi nen amah an lo lawm a, Borapansuri ah pawh khawtlangin lo lawmin vantlang inkhawm an neih pui a ni. Zanah Chawngte lutin Chakma Autonomous District Council hruaituten an lo thleng a, zanah hian a pualin cultural programme neih a ni bawk.

Minister hian vawiin zing dar 9:30 khan Chawngte chhuahsanin Lunglei High Power Committe ten Lungleiah chhun chaw an buatsaih a, hemi hnu hian Aizawl panin a chhuak leh ta a ni. Ruahman lawk ang chuan zanin hian Tourist Lodge ah Trade & Commerce Minister Pu Lalrinliana sailo-in zanriah a buatsaih sak ang a naktuk December ni 11 (Pathianni) hian Lengpui Airport atangin Mizoram a chhuahsan ang.

Bangladesh Minister hi Pu Nihar Kanti Chakma, AH&Vety Minister leh Pu S.Laldingliana, Parliamentary Secretary ten an tawiawm a ni.