894/2026-2027 

Dated Aizawl, the 8th July, 2026: Coffee Board of India-a Coffee Quality Division chuan a vawikhatna atan Mizoram-ah Barista Training Programme chu vawiin chawhma dar 10:00 khan ELK Business House, ELK Plaza, Chaltlang, Aizawl-ah an buatsaih. 

Ni nga awh tur training programme hi Coffee Board of India leh ELK Business House tangkawp buatsaih a ni a, ELK Business House hi In-City Partner a ni. He programme-ah hian state chhung hmun hrang hrang atangin café hnathawktu te, barista nih tum te, sumdawng te, leh coffee ngainatute an tel a ni. Participants-te hian coffee tui taka siam dan, espresso siam dan, milk texturing, manual brewing methods, coffee tem leh a tui bik hriat dan, café workflow, customer service, leh bungraw enkawl dan chungchangah theoretical leh practical training an nei dawn a ni.

Soil Director Pu Vanlalmuanpuia Chhangte chuan coffee chin pawimawhna a sawi a, participants-te chu coffee sumdawnnaa hun tha inhawng mek hmu thiam turin a fuih a ni. 

Keynote address sawitu Soil Joint Secretary Pu Mark Lalthanliana chuan coffee sector hmasawnna leh value addition kawngah training pawimawhzia a sawi a. Mizoram-a coffee hmasawnna atana nodal agency an nih angin department hnuaia hmalakna hrang hrangte a sawi bawk.

He programme hi Pu Lachit Deka, Senior Liaison Officer, Coffee Board of India, Kolasib-in a kaihruai a. Pu Jayanta Ghosh, Deputy Director (Extension), Coffee Board Regional Office, Silchar chuan kalkhawmte lawmna thu a sawi a. Pi Esther Khiangte, ELK Business House chuan coffee sumdawnnaa a thil tawnte sawiin hun a hmang a. Pu Yatisha Gowda, Master Barista Trainer, Bengaluru chuan kalkhawm te a zirtir a. Pu Lachit Deka, Senior Liaison Officer, Coffee Board of India, Kolasib chuan lawmthu sawiin hun a khar a ni.

He programme-ah hian Mizoram-a coffee kaihhnawih skill, entrepreneurship, leh value addition-a pawimawhzia thlur bing niin, Mizoram-a coffee leh café sector thang mek tichak tura a puih beisei a ni.