Society hrang hrang atanga bawnghnute lak khawm quality test-na khawl Automated Milk Collection Centre MULCO-in a din chu vawiin khan AH&Vety Director Dr. L.B. Sailo chuan a hawng a, a hawnna inkhawm hi Durtlang Collection Centre-ah hman a ni.

MULCO Chairman Pu Vanlalchhunga’n inkhawm hi kaihruaiin MULCO Managing Director Dr. Lalhmingthanga’n report a pe a. Mipui ten bawnghnute quality tha leh thianghlim zawk an hmuh theih nan leh bawng vulhtuten an bawnghnute quality that dana zira man sang zawka an bawnghnute an hralh theihna tur atan Collection Centre changtlung tak 8 heng hmunah te siam a ni : Serkhan, Lungdai-ah 2, Sihphir-ah 2, Durtlang North, Durtlang leh Muthi. Heng bakah hian hmun 5 dangah bawnghnute lakkhawmna siam tum mek a ni bawk.

Automated Milk Collection Centre pakhat hi Rs. nuai 10 zet senga bun a ni a, khawl changkang tak hmanga thuam an ni vek a ni. Bawnghnute quality rang taka test-na Milk Analyser te, bawnghnute-a natna hrik tam lam tehna te, mastitis test-na CMT kit leh CoB test-na atan water bath te dah a ni. Bawnghnute quality vawn that nan litre 1000 lenna Bulk Milk Cooler leh Silent DG set leh Syntex tuizem litre 2000 dawng te dawh a ni bawk. Milk Analyser hian bawnghnute quality enfiah mai bakah a that leh that loh dan a zirin bawnghnute man a chawk chhuak nghal thei a, thla tawpah mimal tin te bill lak zat tur a chawk chhuan nghal thei a ni. Bawnghnute-ah hian natna hrik tam tak a awm thei a, a sawr thlak hlima dah vawh nghal loh chuan heng natna hrik te hi a inthlah pung chak em em a. Chu chuan bawnghnute quality a ti chhia a, a tlo loh phah mai bakah rim dang a siam thei a ni. Chumi ven nan chuan Bulk Milk Cooler hi bun a ni.