Mizoram sorkar flagship programme NLUP kaltlanga siam MULCO hmalakna Indigeneous Milk Product Plant Thuampui a siam mek chu vawiin khan AH&Vety Minister Pu Ngunlianchunga’n a tlawh.

Minister chuan NLUP hmalakna avangin bawnghnute tharchhuah a pung nasa a, bawnghnute sawngbawlna tur khawl lian leh tha zawk MULCO in a neih belh hial a lo tul ta chu thil lawmawm tak a ni, a ti a. He khawl hmang hian bawnghnute atangin eitur tha leh hrisel an siam belh thei dawn a, bawnghnute lak zat pawh nasa takin an tipung thei dawn a ni, a ti.

Indigeneous Milk Product Plant hi cheng nuai 350 senga din mek niin, February 2015 hi chuan hnathawk thei tura siam zawh hman beisei a ni a. He khawl hmang hian paneer, dahi, lassi, flavoured milk, ghee, butter, cheese leh a dangte siamchhuah a ni ang.

MULCO hnuaiah hian affiliated society 37 an awm mek a. Producer member 850 awmin heng zinga 450 te hian MULCO ah bawnghnute an chhung mek a ni. January ni 1 atanga ni 12, 2015 chhung hian nitin bawnghnute 7970 litres chu MULCO ah chhun luh a ni.