Tukin zing khan Mizoram Law Commission Chairman Pu R.Lalrinawma chuan PWD hotu thenkhat leh helai kawng cheitha mektu Tantia Company hotute  hruaiin Bawngkawn leh Zemabawk inkar kawngpui cheithat mek a hmuna an enfiah.

Pu R.Lalrinawma chuan he kawng pawimawh tak hun engemaw ti chhung a chhia chu pawi a tih thu a sawi a. Hetih chhung zawnga he kawng hmangtu mipuiten dawhthei taka an nghak thei chu fakawm tiin lawmthu a hrilh a, hun reilote chhungin kawng tha tak an neih a beiseipui thu a sawi a ni. Mipui mamawhna hre reng chunga theihtawp chhuah turin Tantia Company chu Pu Rinawma hian a ngen a, chhun zan zawma hna thawk turin leh zanreh kawngpui thawl lai ah phei chuan labour 100 aia tlem lo bung thin turin a hrilh a ni.

He kawng thawk tur hian Mizoram PWD leh Tantia Company ten 30 March 2011 khan inremna an siam a, Krismas hma ngeiin Red Rose-Berawlui black-topping tih hman an tum. Tun dinhmunah Tantia Company pawhin he kawng siamna tura hmanrua mamawh an nei vek tawh a, hna an tan tawh a ni. Inremna an siam ang chuan 15 April 2011 leh 15 April 2012 chhunga he hna hi zo tura tih an ni a, he kawngpui chei nana sum ruahman zat chu cheng nuai 993 a ni.