Nimin khan Siaha District Bawrhsap Pi Harleen Kaur IAS leh Addl.DC Pu N.Chakhai te chuan Tipa khua leh Palak Constituency hnuaia Model Village Saikao khua te an tlawh. Tipa Circuit house-ah khawtlang hruaitute nen inkawmin NH 54 laihzauh tura compensation chungchangah khawtlang hruaitute thil hriat duh hrang hrang te hrilhfiahin, Bawrhsap chuan harsatna an neih phawt chuan inthlahrung lo va amah chu pan thin turin a chah a. NH 54 laihzauh tur hi a chhawr tangkai tur vek kan ni avangin, mipuiten hnathawktute leh sawrkar tan harsatna siam lo va, sawrkar leh kawng zauh hna thawktu tur JICA ( Japan International Cooperation Agency) te tawiawm tlat zel turin a ngen.

Pi Harleen Kaur hian Tipa Playground-a Vanbandhu Kalyan Yojona(VKY) hnuaiah Ministry of Tribal Affairs te bultum leh Directorate of Sports & Youths services ten an buatsaih, Mizo Traditional Games-2017 chu a hawng nghal a ni. Tipa atang hian Palak Constituency hnuaia Model Village atan a thlan Saikao Village tlawh nghalin, Khawtlang hruaitute nen inkawm hovin, Model village hnuaia hmalak tawhna leh hmachhawp hrang hrang te huangzau taka sawiho a ni bawk.