No.3894/2021-2022
Aizawl, the 3rd February 2022: Vawiin khan Mizoram Sawrkarin Home Minister Chairman-na hnuaia a din High Level Committee on Myanmar Refugees in a lo rel tawh angin, Aizawl District Level Committee on Myanmar Refugees chu SP Conference Hall-ah Bawrhsap Dr. Lalhriatzuali Ralte hovin an thu khawm a. Committee ah hian Additional DC, SDO(Sadar), EE(PHE), EE(P&E), DCSO (E&W), CMO(E&W), City Local Council, CYMA leh All Mizoram VC Association aiawhte an tel a ni.

Committee hian Aizawl District chhunga Myanmar Refugees te chhiarpui neih dan turte, ID pek chhuah dan turte, ei leh bar, zirna, hriselna chungchangte bakah a tul ang zela Refugee Camp sak belh dan turte an rel a, Sawrkarin Refugees-te tuamhlawmna tura sum a pekte hman dan tur an ruahman bawk a ni.

Tun dinhmunah Aizawl District-ah Refugee Camp pali(4) - Synod Revival Camping Center (SRCC), Neihbawih, Sports Council Hostel, Mualpui, Sairang leh Sihhmui-ahte awmin heng Camp-ah te hian Refugees 480 an awm mek a, heng bakah hian chhinchhiah lem lohvin Aizawl District-ah hian Raltlan mi 5000 vel awm nia hriat a ni bawk a ni tih tarlan a ni a.

Vawiin District Level Committee hian VC/LC tinah VCP/LC Chairman na hnuaiah NGO-te puihbawmnain Village/Local Level Committee on Myanmar Refugees din a rel a. Heng Village/Local Level Committee hi din fel a nih veleh he Committee kaltlang hian Myanmar Refugees chhiarpui hi neih tur a ni ang a.  District Level Committee hian Refugee Camp awmsate leh a tul huna sak belhna hmun turte a huhova tlawh an rei bawk a ni.