Vawiin khan Lawngtlai DC Conference Hall ah Digital India Week, 1 – 6 July 2015 leh E-District, Lawngtlai Centre thar chu Bawrhsap Pu J. Hmingthanmawia’n a hawng.

Pu J. Hmingthanmawia chuan Information Technology lama sawrkar hmalakna te chu awlsam zawka mipuite rawngbawlna atana tih a ni a, hun tlem zawk, senso tlem zawk leh tha zawka hnathawhna tur hmanrua a ni, a ti. Digital India Programme chuan Information Technology hmanraw tha leh changtlung, thiamna rintlak leh hman tlak, leh tharchhuaktu ni tura hriatna haichhuahna kawngah te hma a la dawn a ni a ti bawk.

E-District Manager, Pu Lalchhuanmawia Ralte in a tarlan danin Lawngtlai E-District Centre chu kum 2014 atang khan mumal takin a kal tawha, amaherawh chu hnathawh theih tura ruahman chi 35 atangin chi 4 chauh an la thawk thung. Tuna an hnathawh lian ber chu DC Office Certificate te lo pek chhuah an ni rih a, Certificate hrang hrang 1200 lai an pek chhuah tawh thu a sawi. Hei bakah hian Bualpui (Ng) ah mumal taka Common Servicing Centre kalpui mek a nih thu a tarlang tel bawk.

He inkhawm, Pu Lallawmawma, SDO Sadaar kaihhruaiah hian Pu KL Vulmawia, Additional Superintendent of Police, Lawngtlai chuan “Social Media leh Cyber Security” tih thupui hmangin zirtirna a nei a,  Pi S.T Lalvensangi, SDC, Officer –in- Charge, e- District Centre chuan E- District hnathawh dan hrilhfiahna hun a hmang bawk.

He hunah hian Government Region Higher Secondary School zirlaite leh chanchinbumite bakah mi thahnem tak an tel a ni.