No.2706/2021-2022

Aizawl the 25th October, 2021: Nimin (Pathianni) chawhnu dar 1:00 khan Pu C.C. Lalchhuangkima, Deputy Commissioner, Khawzawl District chuan District Hospital, Khawzawl-a Oxygen siamna khawl Pressure Swing Adsorption Plant (Oxygen Plant) chu a hmunah kalin a hnathawh dante a enfiah a, Khawzawl District chhunga damlo, oxygen mamawh tak takten hmun dang pan ngai lova Khawzawl ngeia Oxygen mamawh an hmu thei tawh tur chu lawmawm a tih thu a sawi a ni.

Prime Minister's Citizen Assistance and Relief in Emergency Situations (PM CARES) Fund kaltlanga District Hospital, Khawzawl-a Oxygen Plant bun hi minute khata Oxygen litre 250 siamchhuak thei niin, October ni 7 khan hawn a lo ni tawh a. A khawl lamah harsatna a awm zui avangin DC Office leh District Hospital a thawktuten a tul angte buaipuia hma la nghalin, a khawl siamtu company ISGEC technician ten theihtawp chhuahin siamthat hna an thawk zui nghal a ni. Mihring tana oxygen hipluh tur thianghlim zawng (purity) hi 90% leh a chunglam chu tha tawka ngaih a ni a, District Bawrhsap in a tlawh laia PSA Plant in Oxygen a pekchhuah thianghlim zawng hi 92% vel a ni. Electric voltage mumal dan azirin PSA Plant hian oxygen purity 96% thleng a siamchhuak thei tih company technician-te chuan DC hi an hrilh bawk.

Oxygen siamchhuahna khawl hnathawh dan kalphung hi ISGEC Company technician ten Khawzawl District Hospital-a thawkte hnenah zirtirna an pe tawh a. Tun dinhmunah PSA Plant leh damdawiina khumte pipe hmanga thlunzawmna (MGPS) hnathawh zawh loh tlem la awmin, hei pawh hi rei lotea zawhfel theih tawh beisei a ni.

Khawzawl District Bawrhsap hi Pu H. Lalramenga, SDC, Dr. Lalnunpuii Renthlei, Medical Officer (Ayush) leh Dr. BK Das, Assistant Manager, ISGEC company leh Chanchinbumi ten an tawiawm a ni.