Vawiin hian Serchhhip District Task Force on Beti Bachao Beti Padhao (BBBP) te chu an chairman Pi Sangchhin Chinzah, Serchhip Bawrhsap ni bawk hovin an thukhawm a, kum 2018-19 chhunga BBBP Scheme hmalakna tur Action Plan siam chu Central lama thehluh atan an pawm.

He Scheme hi Ministry of Women and Child Development in a ruahman anga India rama District hrang hrang 640 a kalpui tur hmalakna a ni a. Hmeichhe naupang/fa an lo puna, zirna leh hmasawnna lama an lo than nasat zawkna tura hmalakna niin a tum pawimawh ber chu ram mipui hnena chutiang lam zirtirna (awareness) pek a ni.  Hmalakna tur District ah Task Force din niin member Department te kaltlangin hmalakna peng hrang hrangte kalpui tur a ni a. Chung hmalakna tur peng hrang hrangte chu meeting hmasaah a lo duangtu tur inruat niin rawtna hrang hrang lut khawmte chu vawiin hian thlir ho a ni a, pawm a ni ta a ni.

Bawrhsap Pi Sangchhin Chinzah chuan, ruahmanna duante chu Central duh dan (guidelines) mil thei ang ber tura  siam a nih thusawiin, a taka hmalakna kalpui hunah pawh hlawhtling taka BBBP kalpui ngei a pawimawh thu a sawi a. Ruahmanna changtlung tak an siam avangin member Department te chungah lawmthu a sawi bawk a ni.

Vawiina meetingah hian Addl DC Pu Chuauhnuna leh member Department te an kal kim thei a ni.