Bharat Scouts & Guides National Headquarters, New Delhi bultumin India rama Scouts & Guides intawhkhawmna lian berte zing ami pakhat National Integration Camp (NIC) chu State Training Centre, Tanhril-ah ni 18-24 January, 2012 thleng awh tur neih mek a ni a, nimin chawhnu dar 3:00 khan Mizoram Chief Secretary Pu Vanhela Pachuau chuan he Camp hi a hawng.Camp hawnna inkhawmah hian Bharat Scouts & Guides National Headquarters-a Joint Director Pi Geeta Rawat chu Khual Zahawm chan changin a rawn tel ve a ni.

National Integration Camp hawngtu Pu Vanhela Pachuau chuan state pawn atanga lo kal zawng zawngte lawmna chibai a buk a, ram chhungah Mizoram hre ngai lo tam tak an awm laiin Camp chhim tura lo kal te chu a leilung ngei rawn rap a, Mizote hnamzia leh nunphung rawn hmu an nih avangin an haw leh hunah pawh Mizoram chanchin hrilh darh a, he state mawizia leh a mi chengte chanchin duhawm lai apiang puangzar turin a chah a ni. India chu hnam hrang hrang awmna ram a ni a, hetiang Camp hian kan inkarah inhriatthiamna leh inpumkhatna thuk leh tha zawk a siam thei a ni, a ti. India ramchhunga chitin hnam tin, tawng leh sakhaw hrang inpawlhna ramah hian kan zavaiin India mi kan ni tih hi chhuang ngam ila, ramchhung mi zawng zawng te hian tawng khat ‘Hindi’ hmang tlang thei ila, chutiang inpumkhatna nghet tak neih theih tur chuan tun tuma Integration Camp neih pawh hi hmang tangkai theuh i tum ang u, a ti.

Khual Zahawm Pi Geeta Rawat pawhin National Integration Camp hlawhtling tak neih theihna turin duhsakna a hlan a, Mizoram chuan thinlung taka a mikhualte a lawm thin hriain hun rei tak atang khan lo zin a chak thin thu a sawi a. Bharat Scouts & Guides te hi remna thu tlangaupuitu tangkai tak an ni a, ramchhung mai bakah thenawm ram Pakistan thleng pawhin tunah hian tha an thawh mek a ni, a ti. Scouts & Guides thiltih reng rengah Mizoram naupangte pawh rampum huap thilah an tel that thin avangin lawmthu a sawilang a ni.

National Integration Camp hi Directorate of Sports & Youth Services Department-a Scouts & Guides Wing ten buaipuiin North East Regional atangin Asst. Director Pu Amar B. Chhetri kaihhruaina hnuaiah he Camp hi neih a ni. He Camp-ah hian state 24 atangin Scouts & Guides 600 chuang an lo kal a. Mizoram aiawhin Saihnuni Sailo Memorial School, Bungkawn, Aizawl leh Don Bosco, Saiha te an tel a ni. Nimin hawnna inkhawmah state engemawzatin an hnam lam leh zai te an entir a, Camp chhung hian inpumkhatna lam hawi programme chi hrang hrang an hmang ho dawn a ni.

National Integration Camp hi 23rd January 2012 dar 3:00PM ah khar a ni ang a, kharna hun hi Pu Lal Thanhawla, Chief Minister, Mizoram & President, Mizoram State Bharat Scouts & Guides-in a hmanpui beisei a ni.