Vawiin khan Mizoram Bharat Scouts & Guides rorelna sang ber State Council Meeting chu Chief Minister’s Banquet Hall, Mc Donald Hill-ah neih a ni a. State Council Vice President pahnih School Education Minister Pu H.Rohluna leh Sports Minister Pu Zodintluanga bakah Council member dangte meeting-ah hian an tel.

Chief Minister Pu Lal Thanhawla, State President ni bawk a zin avanga a ai awha thusawitu Vice President Pu Zodintluanga chuan information technology khawvela cheng naupang leh thalaite’n mobile phone, computer leh tv an hman nasat avangin pawn lam infiam leh inkawm hlimte, taksa insawizawi te an ngaihthah a, hei vang hian an inthazo lovin, an chhel lo sawt viau nia a hriat thu a sawi a. Scouts & Guides ah hian infiamna leh thiam thil chi hrang hrang an zir thin bakah aia upa zahna, thuawihna leh a huhova nun an zir a, hei hian mihring puitling, khua leh tui tha ah a siam a ni, a ti a. Aia upa zahna, tlawmngaihna leh Kristian nundan tha a bo loh nan zirna lama kan intlansiak rual hian nundan tha kan zir tel reng a pawimawh a ni, a ti bawk.

School Education Minister Pu H.Rohluna pawhin thu sawiin kumin February thlaa Vice President-a lakluh a nih angin a mawhphurhna hlena Scouts & Guides hmalakna a theih ang anga tawiawm zel a inhuam thu a sawi a. Khawtlang thatna tur thil tam tak he pawlin a lo thawh thin chu chhunzawm a, hmasawn zel turin duhsakna a hlan a ni.

Parliamentary Secretary Pu Joseph Lalhimpuia chu vawiin inkhawmah hian State Council Member ni turin an pawl Vice President Rev. Dr CL Hminga’n a lawm lut a ni.

State Chief Commissioner Pu Lalzirmawia Chhangte, Sports&Youth Services Director ni bawk kaihhruai Council Meeting-ah hian kum 2014-15 chhunga hmalakna tur an chhawp chhuahte sawiho a nih hnuah Council hian a pawm a. State Secretary Pi K.Lalliantluangi’n kum kaltaa an pawl hmalakna te a tarlang bawk.