No.2041/2020-2020 

Vawiin khan Pu K Lalrinliana, Minister of State for Food, Civil Supplies & Consumer Affairs Department, Kolasib Assembly Constituency bialtu MLA ni bawk chuan YMA day pualin a bial chhung a YMA leh MUP branch hrang hrangah Parachute, Mask leh Hand Sanitizer a sem.

Minister Pu K Lalrinliana chuan Covid-19 hri dona kawngah khawtlang ang a hmalakna a pawimawh thu a sawi a, hemi kawngah hian tlawmngai pawl hrang hrang te an thawh hlawkin an tangkai hle a ni, a ti a, VLTF te ruahmanna a YMA member thahnem tak ramri veng a riak mek te leh riakchhuak tur a inpe thahnem tak an awm chu fakawm leh thlamuantlak a tih thu a sawi bawk a ni. Pu K Lalrinliana chuan Covid-19 dona kawng a sawrkarin inkaihhruaina a duan te chu tha tak a zawm turin a chah a, hun khirhkhan tak kar a khawtlang himna tur a hmalaknate chu tha thlah lova fimkhur tak chung si a kalpui a tul thu leh Sawrkar thuchhuak te ngaichang thiam turin a chah bawk a ni. 

Minister hian Kolasib khawchhung a hmalakna hrang hrangte a enpui nghal a, College veng a tlawhnaah hian Nula Lineth Lalmalsawmi, D/o Rochangliana, College veng a khawsa, GNM zirchhuak chuan Kolasib district a Covid-19 dona kawngah a tul apianga che chhuak tura a inpek thu ziakin Pu K Lalrinliana hnenah hian a pe a ni.

Minister hian Kolasib khaw chhung a Khuangbuilam, Vengthar, New Diakkawn, Diakkawn, College Veng ,Project Veng ,Venglai, Tumpui, Hmarveng, Electric Veng, Saidan, Tuitha Veng te bakah Bangbalkawn, Chhimluang south, Meidum, Bairabi 'S', Bairabi 'N', Awrpuara Veng, Mizoram Gorkha Youth Association, Sub-Headquarter YMA Kolasib leh Sub-Headquarter MUP Kolasib te hnenah a tul a hman tur parachute, mask, glove leh hand sanitizer a hlan a, Bairabi North leh South VLTF te hnenah tanpuina sumfai a pe bawk a ni.