Nimin (4/8/2016) khan Bilkhawthlir khuaah Department pathum Agriculture, Soil & Industry hnuaia beneficiaries te hnenah NLUP 3rd & 4th Phase sem a ni. NLUP semna inkhawm hi Bilkhawthlir community Hall ah neih a ni. Pu K. Lalrinthanga, MLA, Parliamentary Secretary ni bawk chu khuallian niin, Pu R. Lalnunzira DAO, Kolasib in inkhawm hi a kaihruai a, Department hrang hrang te hnen atangin report ngaihthlak a ni .
Khuallian Pu K. Lalrinthanga chuan thu sawiin MLA term a chelh chhunga harsatna lian tham a bial chhungah awm lo chu lawmawm a ti a. Mizoram mipui te rinphak bakin NLUP chu a hawlhtling niin a hria a, Rambuai kan lo nih tawh avangin mi ram angin eizawnna a awlsam lo va, remna leh muanna kan neih hnuah hmasawnna a lo awm ve thei chauh a ni a ti a. NLUP ah hian hun hmasa lam atangin hlawhtling tak tak an lo awm tawh a, kan ramah thil chi hrang hrangah hma kan sawnin kan kohhran rawngbawlna te pawhin hma a sawn a ni a ti. NLUP ti hlawhtling tute zar hi khawtlang leh ramin a zo mek a. Sawrkar tan pawh hna thawh a lo awlsam ta a.
Chuvangin vawiin a NLUP dawngtute pawh hian inhlawhtlinpui chuan nangmah ni tan mai nilovin midangte tan malsawmna in lo ni thei dawn a ni a ti a. Tlangram lo neih kum tina insawn chu banin lo hmunnghet nei te an lo pungzel a, kan buh thar pawh a lo hlawk zawk ta a ni a ti a. NLUP ti hlawhtlingte chhawmdawl zel na tur Scheme thar NEDP pawh duan chhoh mek zel a ni a. Tuna NLUP dawng mek te pawh hian nguntak a ngaihtuahna hmang chung a hma la turin a fuih a ni.
Department hrang hrang atangin hetiang hian NLUP sem a ni.
1) Agriculture Department - WRC mi 60 te hnenah Rs 20000/- zelin
2) Industry Department - mi 35 te hnenah trade hrang hrang Peti trade - Rs 50000/- Bakery -Rs 44000/- Automobile - Rs 49000/-
3) Soil Department - mi 28 te hnenah Rs 31780/- theuhin.
Pi Duhzuali BDO Bilkhawthlir hnen atangin NLUP dawngtute fuihna thu ngaihthlak a ni a, NLUP dawngtu te chu an pawisa dawn te hmanna tur dik tak a hmang turin a fuih a, Rangva in chung tur chhungkaw 58 te hnenah Bandle 4 zela sem nghal tur a nih thu a sawi nghal bawk a ni.
