1388/2022-2023

Kolasib dated 28th July 2022: Vawiin chawhma khan India ram State hrang hrang a district 773-a India zalenna kum 75 lawmna pual a hman mek 'Ujjwal Bharat, Ujjwal Bhavishya' chu Bilkhawthlirah Pu John LT Sanga, Deputy Commissioner hovin hman a ni.


Pu John LT Sanga, Deputy Commissioner chuan Kawphetha chu kan nitin nunphung kalpui nana kan mamawh, kan hnathawhna hmarua tinungtu leh hmasawnna hna thawh nan pawh a mamawh hmasak ber te zing ami a nih avangin India zalenna kum 75-na lawmnaah pawh ngaih pawimawh a nih thu a sawi a. India ram chu sakhaw hlawm lian tak tak pian chhuahna leh thiamna hrang hrang zirchhuahna hmun ram ropui tak a nih thu tarlangin rualkhai tak a, intluktlanna leh inzahtawnna a awm theih nan Constitution felfai tak hnuai a khawsa kan nih thu a tarlang a. Heng chanvo kan hman țangkai theihna chhan hi zalenna kan neih vang a nih thu leh chu zalenna chu kan hlut thiam a pawimawh thu a sawi. Sawrkai laipui ruahmanna hnuai a 'Kawphetha Kutpui' hmanna hian Scheme hrang hrang kaltlanga mipuite chanvo țangkai zawk a hman a nih theih nan leh khaw hrang hranga chhungkaw tam zawkin eng an neih theih nana hmang turin kalkhawmte a chah a. Zalenna hnuai a hamțhatna tam tak kan dawn rualin khua leh tui țha ni turin dikna ngaina mi, midangte țanpuitu ni turin leh khawtlang tih hmasawn nana mawhphurhna hrang hrang kan neih te ngai pawimawh turin a chah a, kawphetha renchem kawngah midangte zirtirtu ni turin a fuih bawk a ni.

Pu Lalzarliana, Executive Engineer chuan India zalenna kum 75-na lawmna pual a 'Ujjwal Bharat, Ujjwal Bhavishya', Kolasib district-a a țum hnihna atan Bilkhawthlirah hman a ni chu lawmawm a tih thu sawiin chenna in mai piah lamah lo, huan leh hnathawhna hmunahte mamawh anga hman tur kawlphetha pek vek hi sawrkarin a ngaih pawimawh zia lantirna a ni tih a sawi. Sawrkar laipui ruahmanna a Revamped Distribution Sector Scheme, Solar Rooftop leh Saubhaghya kaltlangtein kawlphetha thlunzawmna thawm changtlunna hna te, chenna in, huan leh lo a kawlphetha thlunzawm hna te leh ni zung chakna hman țangkai hna kalpui mek a nih thu Pu Lalzarliana chuan tarlangin kum 2023 chhunga Pre-paid Metre hman țan a nih theih nan hmalak mek a nih thu a sawi bawk a ni. Dan lova kawlphetha pawh rukna leh meter khawih damglamna awm țhin avanga harsatna awmte tihbo a nih theih nan dan anga dik taka kawlphetha hmang țhin turin kalkhawmte chu Pu Lalzarliana chuan a chah a. Consumer an nih angin chanvo țha tak tak an neih te hrechiang a chhawr țangkai turin a ngen bawk a ni.

Vawiin DC Office, Power & Electricity Department leh NEEPCO țangkawp buatsaih, ' India a eng chuan kan hma lam hun a eng' tih thupui hmang a 'Kawlphetha Kutpui' hmanna hi Pu Lallawmawma, Addl. DC in a kaihruai a. Kawlphetha pekchhuah kawng a Sawrkar laipui Scheme hrang hrang PowerPoint Presentation hmanga entirna hun te neih niin Saubhaghya scheme hnuaia a thlawn a kawlpheta thlunzawmna, Keicham veng leh Phaipheng zau aiawh ațangin thusawi ngaihthlak a ni bawk a ni. He hunah hian Bilkhawthlir khaw chhunga Sawrkar office hrang hranga thawktute, NGO leh khawtlang hruaitute an tel a, Pu Timothy R.Lalhmangaiha, BDO, Bilkhawthlirin PMAY-G hnuai a In sak țanpuina pek chhuah chungchanga hriattur pawimawh tarlanna hun a hmang bawk a ni.

Attachment

  • Loading attachment...