578/2025-2026

Dated Serchhip, the 13^th May, 2025: Vawiin khan Serchhip District Civil Defence Committee chu an Chairman Pu Paul L Khuma, Serchhip Bawrhsap hoin DC Meeting Hall-ah an thukhawm a. Indona a lo thlen thulha mipui te awm dan tur nunchan zirna Civil Defence Mock Drill leh Blackout chungchang an rel. 

Tun hnaiah India leh Pakistan indona a thlen avangin India ram pumah mipuite inralrin dan tur zirtirna kalpui a ni a. Inkahhaina (cease fire) awm tawh mah se, sawrkar chuan mipuite inzirtirna hi kalpui ngei tul a ti a. Chuvangin, Serchhip khawpuiah May ni 15 (Ningani) hian Civil Defence Mock Drill leh Blackout neih ni se tiin vawiin meeting chuan a rel a ni. 

He nunchan zirna hi May ni 15, zan dar 8:30 ah neih tur a ni a. Zan dar 8:30 ah Serchhip khawpui veng tina Information Mic kaltlangin ralkhel dar (siren) minute khat chhung tihrik a ni a nga. Siren rik zawh veleh kawlphetha pekchhuahna hmun pui atangin current tih tawp a ni a nga. Hemi hun chhung hian emergency light emaw, inverter emaw pawh tih thim vek tur niin, mahni parda thlenga zar thim vek tur a ni a. Kalkawnga lirthei tlan lai te pawh an awm hmunah dingin, engine leh light te tithim vek tura beisei an ni. Minute 5 chhung blackout hi neih a ni a nga, 8:35 pm ah eng te tihnun leh a ni ang.  

Van chung sang atangin thlawhna in IOC petrol pump chu rawn kapin, kangmei nasa tak chhuak anga lemchan tur a ni a. Team hrang hrang insiamin search & rescue team ah hian Serchhip District QRT te, Fire & Emergency Service te, police te, Assam Rifles leh BSF te an che chhuak a nga. Damdawi in atanga ambulance lo kalin thi leh hliam tuar lema chang te an phurchhuak dawn bawk a ni.