Mizorama Private Hospital zinga a hmasa ber ni turin BN Hospital, Kulikawn ah Thla kim lova naupiang, nau pian felhlel leh harsatna hrang hrang tawkte enkawl na tur atana siam Neonatal Intensive Care Unit (NICU) chu vawiin chawhnu dar 2:00 khan Director of Hospital & Medical Education in a hawng.

He NICU hawnna inkhawm hi BN Hospital Building-ah neih niin he hun hi Pu V. Lalduhawma, Managing Director, BN Hospital in a kaihruai a. Tual Upa Zahlira, Kulikawn Vengthlangin hunserh a hmang.

He NICU hawngtu Director of Hospital & Medical Education chuan hmanlaia thla kim lo leh pian fuh lo te tih dam an harsat thin zia te leh tunah erawh hemi kawngah sawrkar hmalakna avanga naupiang thihna leh nu nau chunga thihna a hniam tak thu te a tarlang a. Hetiang a nih lai hian IMR ah tunhnaiah harsatna kan tawh leh dante sawiin Director, DHME chuan IMR leh MMR avanga harsatna kan tawh laia hemi tih hniam a nih theihna atana BN Hospital ten NICU an din thei chu lawmawm a tih thu leh he thil hian naupiang thihna kawngah a tha zawnga awmzia a neih ngei a beisei thu te a tarlang bawk.

BN Hospital hi 21.11.2011 khan din a ni a. Tunah hian damlo khum 31 awmin cabin 13 a awm mek a. Tuna NICU hawn thar tak hi damlo 7 awm theihna a niin damlo 12 awm theihna tura tih changtlun zel tum a ni. BN Hospital hi kumina Mizoram Polution Control Board ten Damdawi In bawlhhlawh sawngbawl dan an endik tuma dan ang thlapa an bawlhhlawh te sawngbawl awmchhun an ni a. Tunah hian Nau neihna bik atan chauh ni lovin natna hrang hrang avanga damlo te pawh enkawl an ni a. Doctor thiam te rawn theihin an awm reng a ni.