Aizawl-a cham mek British Deputy High Commissioner, Sanjay Wadvani chuan vawiin khan Governor Lt.Gen (Retd) M.M.Lakhera, PVSM, AVSM, VSM chu Raj Bhavan ah hmuin vawiin vek khan Industries Minister Pu S.Hiato pawh a office-ah a hmu bawk.
 
 
Governor nena an inkawmna ah hian Mizoram chanchin tlangpui, khawtlang nunphung te, thenawm ramte nena inlaichinna chungchang te, eizawnna leh ram dangte nena insum dawn tawnna chungchang te, ram chhung thil thar leh hralh chhuah chungchang te, kawng leh electric power a Mizoram dinhmun te an sawi dun a. Governor chuan Mizoram chu ram ralmuang leh khawtlang nun inpawh tak a nih thu tarlangin hun kal tawha hmasawnna kawnga a pen chak theih lohna chhan hrang hrang te Pu Wadvani chu a hrilh a. Market mumal  awm loh vanga ram chhung thar chhuahin a tawrh dan te, a ram chhengchhiat  vanga kawngpui siam leh tui lak a harsat dan te, hmasawnna ruhrel pawimawh awm loh vanga sumdawnna leh tourism lama a than chak lohna chhan te a sawi a. Tuna Mizoram hmasawnna tarlangin Myanmar leh Bangladesh nena insumdawn tawnna in kawng zau zawk a hawn tur te, oil leh natural gas hausakna haichhuah mek te, thangthar lehkhathiam ten ngaihtuahna zau tak an neih tawh dan te, hydro electric siam chhuahna tur a ngah dan te, organic thlai lama hma lakna tur a neih that thu te Governor chuan a sawipui a ni.

Governor nena an inkawm hnu hian Pu Wadvani chuan Industries Minister Pu S.Hiato chu a office ah a kawm a. Mizoram leilung hausakna leh a thil thar chhuahte atanga industries leh sumdawnna lama Mizoram sorkar hmalak tum dan te Pu Hiato chuan lo hrilhin heng thila private company te nena thawh ho theihna lai te an sawi dun a. Industries Minister nena an inkawmna ah hian Industries Secretary, Industries Director leh Tourism Director te pawh an tel a ni. Pu S.Hiato a hmuh hnu hian DGP Pu Lalrokhuma Pachuau nen a office ah inkawmin dan leh thupek kenkawh chungchanga Mizoram dinhmun an sawi dun a. Pu Wadvani chuan British khualzin ten Mizoram-ah rikrum thila harsatna an tawh palh pawhin DGP chu anmahni pui tura an inghahna tur atan a duh thu a hrilh a ni.

British Deputy High Commissioner hi zanin hian Industries Minister Pu S.Hiato chuan zanriah a kilpui dawn a. Aizawl-a a cham chhung hian Chief Minister leh Chief Secretary te pawh a hmu dawn a ni
 
 

Attachment

  • Loading attachment...