Vawiin khan Home Minister Pu R.Lalzirliana hovin a pisaah tlawmngai pawl hrang hrang aiawh te leh Political Party aiawh te bakah Mizoram sorkar Home Department a Officer ten Bru laklet (repatriation) chhunzawm leh tur chungchang ngaihtuahin Meeting pawimawh tak an nei.

He meeting-ah hian tlawmngai pawl leh Political Party aiawh ten rawtna hrang hrang an neih te sawilangin chung zingah chuan Bru laklet chhunzawm a nih hma ngeiin Sakhan tlangdung Mizo chhungkaw raltlan te hnenah chhawmdawlna pek ni se tih te, Bru lo kir te hi an khaw hluiah theuh dah vek theih an ni lo a nih pawhin Constituency hlawma dah loh ni se tih te, chhawmdawlna sum an dawn tur pawh an chenna hmun tur an thlen hunah an chenna VC te theuh hriatpuiin pek chauh nise tih te a tel.

Home Minister Pu R. Lalzirliana chuan Sakhan tlangdung atanga raltlan Mizo chhungkua te hnena chhawmdawlna sum pe tura chak taka hma an lak mek thu sawiin order pawh chhuah mai hmabak a nih thu a tarlang a. Mizoram chhunga tlanlut te chu Mizoram sorkarin chhawmdawlna a pek tur thu leh Tripura Jampui tlangdunga lut te chu Tripura sorkarin chhawmdawlna a pek tur thu a sawi a. Sakhan tlangdung atang hian Mizo chhungkua 51 Mizoramah an pem lut a, Tripura Jampui tlangdungah chhungkaw 32 an lut thung.

Tlawmngai pawl te ngenna angin Home Minister chuan Bru raltlan laklet dan tur ruahmanna sorkarin a siam te chipchiar takin a tarlang a. Bru raltlan lokir chhungkua ten chhawmdawlna sum an dawn tur pawh Mamit DC kaltlangin an awmna tur khua an thlen hunah sem a ni ang, a ti. Union Home Minister Pu P. Chidambaram-a’n Aizawl a rawn tlawh chhunga tlawmngai pawl hrang hrang te leh Political party aiawh te hnena a lo tiam tawh angin Mizoram sorkar chuan Mizoram Bru te ngei chauh Mizorama lak let an nih theih nan fimkhur leh uluk thei ang berin ruahmanna a siam a ni, Pu R. Lalzirliana chuan a ti bawk.

Sorkar chuan April ni 26 atanga May ni 11 inkar hian Bru raltlan chhungkaw 669, an vaiin mi 3652 Mizorama la let turin ruahmanna a siam a. Mamit District chhunga khaw hrang hrang 21 ah te heng chhungkua te hi sem darh an ni ang.

Vawiina thukhawm te hian Mizoram mi dik tak Bru chhungkaw laklet hi a hma thei ang bera chinfel an duh thu lungrual takin an remti nghe nghe a ni.