No.6465/2020-2021
Mizoram Sawrkar Home Department chuan BSF Company 3 lo thleng chungchangah a hnuaia mi ang hian thuchhuah a siam:
Tun hnaia Assam sawrkar official leh Assam lam mipui thenkhatin Mizoram chhunga thlam an hal leh huan thlai an lo suasam chungchang leh COVID-19 duty post an lo tihchhiat te leh Vairengte daia intihbuaina avanga ramria Mizoram Police kan dahte Assam sawrkarin Assam ramah Mizoram Sawrkarin encroachment an rawn ti tiin kan police te inhnukdawk turin namen lovin Mizoram leh Central Sawrkar an nawr a. Mizoram Police hnukkir tura an nawrna hmanrua atan Mizoram luhka zawng zawngah road blockade an siam a.
Hemi avang hian ramri hrula boruak sosang zel tidai turin Central Sawrkar Ministry of Home Affairs chuan Mizoram Sawrkar kutah BSF Company 3 an rawn dah a. Heng BSF Company 3 te hian Mizoram an rawn thleng ciah hlawm ani. Amaherawhchu, ramri hrula an awmna tur facilities peih a la nih loh avangin an awmna tur hi buaipui mek a ni. Vairengteah chuan Mizoram IR Police awmna thlang Lailapur lamah dah tum a ni. BSF Company 3 ten COVID screening leh a kaihhnawih an paltlang chhung leh an awmna tur buatsaih chhung hian Kolasib leh Bilkhawthlirah dah lailawk an ni.
BSF Company 3 Mizoram lo thleng chungchangah thu diklo veivir an awm tih hriat a ni a. Tuna kan thuchhuah hi Mizoram sawrkarin a kalpui dan a ni e.
