Law Commission Chairman Pu R Lalrinawma chuan vawiin khan Sihphir Venghlun High School office building thar a hawng. He building sakna tur senso atan bialtu MLA Pu R Lalrinawma hian MLA fund atangin cheng 3,30,000 a pe a. Hawnna inkhawm neih a nih rual hian an school atanga HSLC Exam-a passed thar te lawmpuina hun an hmang nghal a ni.

Building thar hawnna inkhawm Pu Lalthardenga, Vice Chairman, Managing Board kaihhruaiah hian thu sawiin Pu R Lalrinawma chuan Sihphir Venghlun High School-in office building thar tha tak an nei chu a lawmpui a, hei hi an tana thil tangkai a nih piah lamah a hmanna tur dik taka sum an hman avangin midangte tan pawh entawn tur tha tak an siam a ni, a ti. He school-in a din tirh atanga result tha tak kum tin an nei thei reng chu fakawm a ti a, zirlaite thahnemngaihna leh zirtirtute taimakna rah nia a hriat thu a sawi. Zirlai pass thar te fuihin sorkar hna chauh thawh tum lo turin a chah a. Sorkara innghat mai lova mahni kea dinchhuah tum tur te, thiamna ziktluak paw chhuak a, State pawnah leh ram pawn thleng pawha hna sang tak tak thawk thei tura an rilru siam thar sauh sauh turin Law Commission Chairman chuan zirlaite a chah a ni.

Sihphir Venghlun High School hi January ni 1, 1994 khan din a ni a. A tirah chuan Sihphir Vengthar High School tih ni thinin School building an neih hma hian YMA Hall-ah bul an tan a. 1998 khan t dap leh rangva hmangiin school building an sa a, 2002-ah NLCPR sum hmangin tuna an school building hi luah mek hi an sa a ni. Kumin High School Leaving Certificate Exam-ah an school atangin zirlai 24 exam zingah 21 an passed a; IIIrd Division-ah 6, II Division-ah 10, Ist Division-ah 4, Distinction-ah 1 an inhlangkai a ni. Kuminah hian zirlai 99 an nei a, Headmaster leh zirtirtu 8 in an enkawl.