Serlui ‘B’ Hydel Project tuikhuahin a chim tur khua Builum khaw mite hnena zangnadawmna pek dan chungchang enfiah tura sorkarin ni 19 June 2009 a din, Builum Inquiry Commission (BIC) chuan a hna thawk zovin vawin khan BIC Chairman Pu S.L. Sailova chuan Chief Minister Pu Lal Thanhawla hnenah a Report chu a thehlut ta.

 

 

Chief Minister chuan hah tak leh rim taka Commission in hna a thawh hnua report a pe thei chu lawmawm a tihthu sawiin, hei hian hlemhletna leh eirukna umbo sorkarin a tumna kawngah tanpuitu tha tak anih ngei a beisei thu a sawi a.Compensation diklo taka lak tumte chu an chungah dan lekkawh ngei a ni ang a ti a. Kan Project lian tak takte pawh hi compensation duhluat vang leh it vang ringawtin a ti tlawlh palh ang tih a hlauh thu Chief Minister chuan a sawi bawk a ni.

BIC hian hnathawh tur - terms of reference - hrang hrang 5 bituk sakte chu a thawk zova. Hnathawh tantirhte atanga Builum khua hi tuiin a chim tan tawh avangin Sub Committee dinin, chu chuan GPS hmangin hna a thawk a ni. Hnathawh chhung zawng hian commission hmaah mi 113 an inlan a, chhechham tir vek an ni. An thusawite pawh video a thlala vekin dah that a ni bawk. An mi kohte zingah hian sorkar department 3 hotute koh tel ve an ni. Zangnadawmna (compensation) pawisa pek zawng zawng belhkhawm hi cheng vaibelchhe 3, nuai 34 leh sangnga zali sawmriat pariat ( Rs 3,34,05,488 /-.) a ni.

Inquiry Report thehluhna ah hian Pu Joseph Lalhimpuia, Vice Chairman, HPC, Lunglei, Pu Vanhela Pachuau, Chief Secretrary leh Pu P.Chakroborty ten Chief Minister hi an tawiawm a. BIC lam atang hian Pu S.L.Sailova bakah member Pu H.Parthasarathy, CE, P&E leh Commission staff te an tel a ni.