347/2022-2023
Lunglei the 29th April’ 2022 : Ministry of Health and Family Welfare, Govt. of India in India Independence kum 75-na lawmna 'Azadi Ka Amrit Mahotsav' puala Mizoram Block tina Health Mela (Hriselna Kutpui) buatsaih kal mekah vawiin khan National Health Mission (NHM), Health & Family Welfare Department huaihawtin Bunghmun Block tan PHC Buarpuiah Health Mela buatsaih a ni. Agriculture Minister leh Bialtu MLA ni bawk Pu C. Lalrinsanga chu khuallian a ni.

Pu C.Lalrinsanga chuan Buarpui PHC huam chhunga mipuiten an mamawh tak Health Mela buatsaih a ni chu lawmawm a tih thu sawiin, a tangkai thei ang bera chhawr tum turin mipuite chu a chah a. Mizote zingah natna inkaichhawn theihloh (Non Communicable Disease) vei kan tamin phai lama kan inenkawlna senso pawh a tam hle a ni tiin kalkhawmte chu mahni hriselna ngai pawimawh theuha an ei leh in te uluka, taksa insawizawi te ngai pawimawha zuk leh hmuam laka fihlim tura tan la theuh turin a chah a ni.

Mizorama kan thlai thar te a hrisel zawk theihnan leh chemical fertilizer hman kan tih tlem theihnan Agriculture Department chuan theihtawp chhuah mekin Sihphir Neihbawih rama Agriculture Farm-ah Bio-fertilizer unit laboratory anih thu a sawi.

A sawi zelnaah Minister chuan Buarpui PHC ti changtlung turin xray room sakna, maternity ward extension, pcc pavement siam leh bungraw hrang hrang - solar panel, incinerator, xray etc te lei nan NEC atangin fund tih fel tawh a nih thu a sawi bawk.

Hawnna program hi Lunglei Medical Superintendent Dr SR Ngurchamliana'n kahruaiin Lunglei SMO Dr Lalrinthangi chuan report pe in Buarpui PHC MO Dr Lalvohbiki chuan lawmthu sawina hun a hmang.

Vawiin Health Mela ah hian District Hospital Lunglei atangin doctor 17 rual leh thawktute, NHM leh Health Department hnuaia programme hrang hrangin clinic leh stall hrang hrang 18 an hawng a. Hengah hian mipui tana a thlawna inentirna leh counselling hrang hrang buatsaih niin, hri danna te pek a ni a. Medicine specialist, Pediatrician, oncologist, gynaecologist, ENT specialist te bakah Optometrist, AYUSH leh Dental doctor te telin Naupang inentirna, hmeichhe lam inentirna, Skin clinic, ENT Clinic, Cancer clinic, medicine clinic, eye clinic, dental clinic, TB Clinic, Malaria counter, NCD Clinic, Tobacco Cessation Counter, AYUSH Counter te ruahman a ni a. Hemi bakah hian Damdawi Lakna Counter pawh siam niin damdawi chi hrang hrang a thlawnin sem chhuah a ni a. IEC Counter pawh ruahman niin he counter ah hian hriselna chungchanga mipuite hriattur pawimawh information leh leaflet te pek chhuah a ni a. ICDS pawhin counter ruahman in ei tur hrisel hrang hrang, nu leh nau inenkawl dan tha te inzirtirna neih a ni. Damlote tan a thlawnin Health ID siam sak an nih bakah Health Care hnuai ah Health Insurance Card (Ayushman Bharat PMJAY Card) siam sak an ni bawk a ni.

Health Mela hi mipuiin an hlut hle a,inentir turin Buarpui leh a chhehvel mipui thahnem tak an kalkhawm a ni.

Vawiina Health Mela hi Lunglei District tana hnuhnung ber niin hemi hma hian Lungsen leh Haulawngah te Health Mela hlawhtling taka lo neih ani tawh a ni.