2811/2023-2024

Lunglei; the 20th of November, 2023: Vawiin chawhma dar 10:00 khan Block Development Officer, RD Block, Bunghmun buatsaihin Govt. High School, Bunghmunah ruihhlo do awareness campaign neih a ni. He Awareness campaign hi ‘Nasha Mukt Bharat Abhiyaan (NMBA)’ leh Mizoram Sawrkar hnuaia ‘Ruihhlo Do’ campaign kaltlanga buatsaih niin, Govt. High School leh Thianbuka Higher Secondary School, Bunghmun atangin zirlai naupang an tel a ni.

Awareness campaign-ah hian Pu H. Lalramenga, BDO, Bunghmun RD Block chuan powerpoint presentation hmangin ruihhlo in mimal, khawtlang leh ram a nghawng dan hrang hrang a tarlang a. Ruihhlo ngawl vei tawh te tan sim leh a harsat em avangin tihchhin loh a him ber tih sawiin, a lo tichhin tawh te pawh ruihhlo laka inthiarfihlim zui hram hram thin turin zirlaite a chah. Pu B. Lalhlimpuia, Officer-in-Charge, Bunghmun Police Station pawhin ruihhlo kaihhnawih bakah hmeichhia leh naupang humhalhna dan leh hrai pawimawh te a tarlang a. Ruihhlo leh chhan dang vanga court in thiam loh a chantir tawh te’n sawrkar hna dil leh thildangah harsatna tam tak an tawk thin tih sawiin, zirlaite chu ruihhlo ti chhin lo turin a chah a ni.

Pu Ngurhmingliana Sailo, President, Bunghmun Branch YMA in ruihhlo langsar zual bakah, miin ruihhlo a tihchhan tlangpui leh a inven dan te a tarlang a. Zirlaite chu mihring nun a hun pawimawh tak, adolescent stage-ah an awm mek tih sawiin, tuna an nun hman dan chuan an hma hun thui tak a hril tih a sawi a. Ruihhlo laka fihlim nih tum theuh turin a sawm a ni.

Awareness campaign hi Pu J.L. Chuailova, Headmaster, Govt. High School, Bunghmun in a kaihruai a. Pu Lalsiamhluna, LDC, BDO Bunghmun office a miin lawmthu sawina neiin campaign a khar a ni.