Vawiin chhun dar 12:30 khan Mizoram Rural Bank Branch 63 na S. Bungtlang Branch chu Lawngtlai District Bawrhsap Pu B. Lalhmingthanga\'n a hawng a. S. Bungtlang Branch hi Lawngtlai District a MRB Branch 4 na niin Mizoram a RD Block zawng zawngah heti hian MRB Branch a awm kim ta a ni. Branch hawnna ah hian Mizoram Rural Bank hotute, Pu Beila Khithie, Election Officer Lawngtlai District te, Pi Saizikpuii BDO Bungtlang South te, Pu Lalremruata Kullai, IPRO Lawngtlai te bakah Bungtlang South khua mipui leh pawl hrang hrang hruaitute an tel tha hle a ni.

MRB South Bungtlang Branch hawnna hi Pu C. Lalmuanthanga Sr. Manager, MRB in a kaihruai a. LADC a MDC Pu Thanglawma te, Pi Saizikpuii BDO, Bungtlang South VCP Pu Vanlalmawia leh YLA Bungtlang South Branch aiawh ten thu an sawi a, Pu R. Zohmangaiha, Branch Manager MRB Lawngtlai in Vote of Thanks a sawi bawk a ni.

Pu B. Lalhmingthanga chuan Mizorama  Bank 14 leh an branch hrang hrang 113 zingah Branch 63 nei MRB chu Mizoram mipuite tan hma la tu pawimawh tak an ni a ti a. MRB kalphung leh an dinhmun tlangpuite sawi chhuak in Bank chhawr tangkai tak tak tur chuan mipui lam in duty kan nei ve a kan in siam that ve a ngai a ni. Sorkar kalphung reng reng ah hian pawisa lam thil engkim hi bank kaltlang a tih a ni tawh a MGNREGS  te pawh bank kaltlang vek a tih a nih tawh avangin mipuite sorkar ruahmanna tih hlawhtlin tura kan inbuatsaih a tul a ni a ti. Bank hawn thar chu Bungtlang South mipuite leh a chhehvel a miten tangkai taka an hman turin duhsakna a hlan a ni.

MRB hi Govt. of India, SBI leh Govt. of Mizoram ten neitu nihna an intawm a; kum 1983 a din tan niin India rama Rural Bank 82 zinga 1 a ni. March 2011 liam ta a khan cheng nuai 480. 05 hlep a nei. MRB Branch zawng zawng te hi Computerised vek an ni tawh , kum 2010-2011 chhung ngeiin Core Banking Solution  hmangin Branch zawng zawng dah tum a ni a, SBI nen inzawmin ATM, RTGS, SWIFT etc. an intawm thei dawn a ni.