Vawiin khan MAL Vice-President ni lai mek Pu C. Chhuanvawra lehkhabu ziah ‘Hmanlai leh Tunlai Mizo Hlate’ tih chu Aizawl Press Club-ah Mizoram University Vice-Chancellor Pu R. Lalthantluanga’n a tlangzarh.

Tlangzarhna inkhawm hi Prof.Laltluangliana Khiangte-in a kaihruia a, lehkhabu chhung thu thlirna chu Pu R. Lallianzuala’n neiin, a bu siamtu Pu C. Chhuanvawra in a sawifiahna leh lawmthu sawina a nei bawk.

‘Hmanlai leh Tunlai Mizo Hlate’ chu phek 300 zen zawna chhah a ni a, he lehkhabu ah hian BUng 20 a awm a. Hun hrang hranga Mizo hla thu lawrkhawm a nih angin Tiau chhak lama chhuak hlate, Mizo hla hlui tho - Tiau thlang lama chhuak hlate, Kristian hla hmasate, Kristian hla thar chhuah chho dan te bakah lengzem hla, hla lenglawng, ram hmangaihna hla leh tunlai hla hrim hrim thlengin a tel vek a ni. A Bung tawp berah hla thu thenkhat sawifiah ngaite sawifiahna chu a bu khartu Bung ‘Hla Tha leh Tha lo chungchang’ tih a awm a ni.