17th April, 2013-a Chakma Autonomous District Council (CADC) inthlanpui nei turah mi 49-in nomination an file a; vawiina inhnuhdawhna hun hawn laiin Chinta Kumar, Independent, DAMDEP Constituency leh Somoti Ranjan Chakma, Independent, JARULDUBASORA Constituency-te chu an inhnuk dawk a ni.

Hetih lai hian ni 2.4.2013 khan Chawngte-ah MPF ten rangva sem tur bundle 232 zet an man niin Chanchinbu-ah a lo lang a. Hei hi thil hriatsual palh a ni. Inthlanna felfai a awm theihna turin State Election Commission (SEC) chuan Model Code of Conduct kenkawh danah a duh fir hle a. State Election Commissioner aiawhin SEC Secretary Pu H. Darzika leh Deputy Secretary Pu H. Lianzela te chuan 26th -27th March, 2013 khan Chawngte tlawhin, Model Code of Conduct bawhchhiat palh a awm lohna turin a hnuaia tarlan ang hian a hmunah ruahmanna an siam nghal a.

1. Chhungkaw 355 hnena sem tura ruahman GCI sheets (rangva) dahna in chu kalh hnan nghal a ni a; a chahbi pawh hi OC, Chawngte kuta hlan a ni.

2. RKVY pawisa draw chhuah tawh chu inthlan zawh hma chuan mipui hnena sem chhuak rih lo turin Executive Secretary, CADC chu hriattir a ni.

3. Oil palm chite pawh chhe mai lo tur anih avang leh a chin pawh a la hun loh avangin sem chhuak rih lo tura hriattir an ni bawk.

Hengte bakah hian, SEC official-te chuan Counting Hall-te, EVM Strong Room te an enfiah bakah Kamalanagar Polling Station, I, II, III, IV te, Security-te inkulhna tur Kamalanagar Higher Secondary School te, Udalthana I & II, Adubangasora leh Saizawh W polling station-te an endik a. Inbuatsaihna kal mekte leh a tihphuisui dan tur chungchangah SDO (Civil) Chawngte office-ah 27.3.2013 chawhnu dar 2:00 khan official-te leh political party aiawhte nen meeting neih zui a ni bawk.

Inthlanna felfai leh thianghlim a awm theihna turin Political Party-te, candidate-te leh mipuite tawimawmna tha tak a awm a tul a, SEC chuan tumahin Model Code of Conduct bawhchhe lo turin a beiseiin a ngen a ni.