17th April, 2013-a Chakma Autonomous District Council (CADC) inthlanpui neih turah Mizoram State Election Commission (SEC) chuan Mizoram-a election neih tawha la hman ngai loh Voter Slip a hmang dawn a ni. Voter Slip-ah hian voter hming te, constituency hming te, part number leh hming te, EPIC number te, serial number te, polling station number leh hmun hming te, vote thlak ni turte bakah voter thlalak a chuang vek dawn a. Hei hi inthlan hma ni-ah election official-ten chhungkaw tinah tlawhin, voter hnenah an pe vek dawn a ni. Hetianga Voter Slip hman a nih chuan, polling station hmuna mahni hming leh serial number zawn buai a ngai tawh dawn lova; hetiang buaipuitu tur political party/NGO an awm a ngai tawh dawn lo bawk a ni.

CADC inthlanpui neih tur atan hian nimin kha hming pek luh theih hun tawp a ni a; Indian National Congress candidate mi 20, Mizo National Front candidate mi 20 leh Independent candidate mi 9 an awm a; vawiin khan nomination paper-te hi endik a ni a, hnawl an awm lo. 3rd April, 2013 chawhnu dar 3.00 thleng candidate tan inhnuhdawhna hun hawn a ni. CADC-ah hian constituency 20 a awm a, polling station 63 a awm bawk a ni. Tun tuma inthlanpui neih turah hian voter 25696 an awm a; vote tamna ber constituency, Kamalanagar N-ah voter 2391 an awm a; vote tlemna ber constituency chu Fultuli niin voter 983 an awm a ni.

SEC chuan CADC inthlanpui chu felfai taka neih a nih theihna turin theihtawp a chhuah zel a. Inbiakpawhna te, inkalpawhna te, venhimna te tihchangtlun chhoh zel a ni. CADC inthlanpui atana Model Code of Conduct chu Lawngtlai District puma hman tur a ni a; CADC area pawn lamah erawh chuan sawrkar hna kal laite chu thawh chhunzawm theih a ni. Inthlanna atana inbuatsaihna enfiahin State Election Commission Secretary Pu H. Darzika leh Deputy Secretary H. Lianzela te chuan 26th-27th March, 2013 chhung khan Chawngte an tlawh a; 11th April 2013 khian SEC official-te hian a hmawr bawknan Chawngte hi an tlawh leh ang.