Chakma Autonomous District Council (CADC)-a Caretaker ni mek, Lawngtlai Bawrhsap Dr Arun T., IAS chuan fel fai leh rualkhai zawka CADC hnuaia thawk zirtirtute thawhna hmun siam a nih theih nan zirtirtu dah leh sawn dan (posting and transfer policy) thar a duang a. Hemi chungchangah hian October ni 13, 2017 khan notification a chhuah.
He ruahmanna thar ang hi chuan zirtirtu reng reng chu an awmna ngaiah kum thum tal an awm ang a, chumi hnuah chuan sawn theih an ni chauh ang. CADC hnuaia sikul zawng zawng chu hmunpui atanga a hlat lam leh kawng that leh that loh azirin Grade thumah then a ni a. Grade A huangah hian CADC hmunpui Kamalanagar leh a chhehvel khaw hnai zual leh CADC sub-headquarters-a sikul 39 dah a ni a; Grade B-ah tlema khirh leh deuh tur khuaa sikul 26 dah niin, Grade C-ah chuan khaw chengker leh kal pawh harsa zual khuaa sikul 40 dah a ni.
Zirtirtu chu a awmnaa kum 3 a awm pumhlum hnuah Grade A atangin Grade B-ah, Grade B atangin Grade C-ah, Grade C atangin Grade A-ah sawn kual thin tur a ni ang a. Zirtirtu dah leh sawn chungchanga thuneihna chu CADC-a Education Officer (PS & MS) te kutah a awm ang a, insawn dilna pawh anni kutah hian theh luh tur a ni ang. Harsatna khirhkhan bik nei an awm a nih loh chuan zirtirtu zawng zawng chu he dan hmang hian transfer leh posting kalpui tur a ni.
