Chakma Autonomous District Council inthlan ni 17.4.2013 a neih turah a hnuai ami ang hian State Election Commission chuan Vote thlak ni a Candidate leh a puitute motor hman dan tur thupek a tichhuak :-

i) Voters te vote thlak tur lirtheia hruai leh thlah khap tlat a ni.

ii) Candidate ten an dinna Constituency-ah an hman tur lirthei pakhat bakah an election agent leh party worker-te chuanna tur lirthei dang pakhat hman phalsak an ni.

iii) Heng lirthei hman phalna hi inthlan hma ni hnih aia tlai lovah Returning Officer hnen atanga lak tur a ni a, motor hmaah langsar taka permit hi tar tur a ni.

iv) Candidate te hi car/ taxi/ autorickshaw emaw ke pahnih nei chi te hman phalsak an ni a. Ke pali nei lirtheiah hian driver tiamin mi panga aia tam chuan phal a ni lo. Candidate leh a agent te hman tur bik permit nei lirthei te hi inthlanni ah midang tan hman phal a ni lo.

v) He khapna dan hian sorkar hnathawk election duty te leh damlo emaw tar chaklo leh rualbanlo phur te a huam lovang.

vi)Dan bawhchhia an awm anih chuan Indian Penal Code leh Motor Vehicles Act hmanga hrem an ni ang.

vii) Khapna dan hian election kaihhnawih ni lo pawimawh dang atana mahni mimal lirthei ken a huam lova, polling station pan nana mimal lirthei ken pawh phal a ni. Polling Station atanga metre 200 bial chhung lamah erawh lirthei eng chi pawh ken luh khap tlat a ni. Hospital Van, ambulance, bawnghnute phur motor, tuiphur, electric emergency duty motor, police duty motor leh election duty-a kal officer te motor pawh inthlan niah hian tlan phalsak an ni a. Terminal pangngaia tlan Bus te; damdawiin pan nan leh pumpelh theih loh thil pawimawh dang avanga taxi, autorickshaw leh lirthei ke pahnih nei ken te bakah damlo leh rualbanlo te phurh nana mimal motor ken pawh phalsak an ni.

District inrelbawlna kengkawhtu ten candidate leh anmahni thlawp tu ten dan phalloh thil engmah an tihlohna turin uluk takin an vil reng dawn a. Lirtheiah puak thei thil, midangte rikrapa, voters te tizam thei thil eng pawh an ti emaw an keng emaw a nih chuan District thuneituten lirthei te hi inthlan zawhfel a nih hma chu an man sak anga. Lirthei neitu, khalhtu leh a chuangte bakah a inhnamhnawih candidate-te pawh dan an bawhchhia a nih chuan dan in a tuk angin man an ni ang.