India ram hi khawvela Democracy ram lian ber a ni a. Democracy-in a turn ber chu khua leh tui kan nih anga kan aiawha roreltu tur duhthlan theihna chanvo kan neih hi a ni. Mipuite hian, he duhthlan theihna chanvo kan neih hmanga kan aiawh tur rilru fim taka kan thlan hian ram hmasawnna leh thanlenna atan hna pawimawh tak kan thawk tihna a ni.

CADC/LADC/MADC hnuaia seat ruak 4 hnawh khahna atana By-Election chu June ni 4, 2014 zing dar 7:00 a.m. - 5:00 p.m. hian ruahman lawk angin neih a lo ni dawn ta a, Mizoram Sawrkar pawhin By-Election neihna tur Polling Station area chhunga awm Sawrkar hnathawkten vote an thlak ngei theih nan he ni hi holiday-ah a puang a ni. He hun pawimawh takah hian ram danpuiin chanvo a pek ang bawkin mawhphurhna pawh a pe tel a ni tih hriain CADC hnuaia 2-Borapansury-ll MDC Constituency, LADC hnuaia 10-Lawngtlai Bazar MDC Constituency, 24-Tuithumhnar MDC Constituency leh MADC hnuaia 11-Tuipang-II MDC Constituency electoral rolls-a hming chuang zawng zawngte chu khua leh tui tha an nihna an vote hmanga tilang ngei turin State Election Commission chuan a sawm a ni.