Chakma Autonomous District Council hnuaia Village Council te inthlanna, ni 25 February 2015-a neih tura Mizoram State Election Commission-in a lo puan tawh angin, inthlanna dik leh felfai tak neia mipui ten an duhzawng tha taka an thlanchhuah theih nan State Election Commission chuan Dan-in thuneihna a pek angin inthlan ni-a motor hman chungchangah hetiang hian thupek a chhuah :-

1. Candidate emaw agent emaw midangin emaw Vote thlak tur te motor hmanga hruai tura phurh khawm phal a ni lo.

2. Anmahni bial chhunga Village Council hmun theuvah, candidate-in a dil a nih chuan ama hman atan motor pakhat hman phalsak a ni a. Returning Officer-in proforma hmangin vehicle permit a pe ang.

Candidate emaw amah tawiawmtu ten emaw motor an hmanna ah, dan-in a phal loh ralthuam leh hmanrua keng emaw, dan bawhchhiatna awm chi dang tih nan an hmang em tih uluk taka vil turin State Election Commission chuan District Administration te a hriattir a. Chutianga candidate emaw mimal motor, voter te rilru tihbuai tuma dan phal loh thila inhnamhnawih man an nih chuan District Administratiion chuan a man sak ang a, inthlan zawh fel hma chu a hren sak ang. Chutianga inhnamhnawih leh candidate te chu dan angin an chungah action lak a ni ang.