Cricket Association of Mizoram (CAM) Prisident Pu Lal Thanhawla, Chief Minister chuan vawiin chhun khan Assam Rifles Lammualah Mapuia Cricket League khelh kallai mek Final tournament, Kulikawn CC leh Ramhlun Venglai CC te inkhelh a enpui.

Chief Minister chuan Mizoramah mi inpete thahnemngaihna avangin cricket game in hma a sawn chho mek zel a ni a ti a. Mizoramah cricket hi duh angin a lar chak thei lova, amaherawhchu tun hma ngaihtuah chuan a lar tawh hle a ni a ti.BCCI a CAM in affiliate chungchangah thutawp siam turin eng engemaw la tihfel tur ala awm thu a sawi a. Mizorama cricket chawikanna kawngah CAM hmalaknate chu fakawm a tih thu a sawi bawk a ni.

Mapuia Cricket League hi ni 9.3.2013 khan Ramhlun Sport Complexah tan a ni a, team 6 lutin, match 16 khelh a ni. Pakhatna hian Rs. 50,000/-, Pahnihna in Rs.20,000/- an dawng a, team dangte pawhin Rs. 12,000/-, Rs. 11,000/-, Rs.9,000/- leh Rs.8,000/- te an dawng bawk a ni.

He cricket inkhelh hming chawitu Mapui hi LPS neitu Lalsawmliana Pachuau fapa Lalrinchhana hriatrengna atana LPS in a bultum a ni a. Kum 5 chhung atan kum tin Rs.1,50,000/- an thawh phawt rih dawn a ni.