No.181/2021-2022

Dated Champhai, the 19th April, 2021: Vawiin khan District Rural Development Agency (DRDA) Champhai leh Govt. Champhai College (GCC) tangkawp buatsaihin tuihna humhalh leh kan tui tlante a lo thianghlim zawkna tur atana hmalakna Jal Shakti Abhiyan 'Catch The Rain' Campaign kaltlang fai hnatlang ‘Shram daan’ chu Bawrhsap Pi Maria C.T Zuali, Chairman, District Water and Sanitation Committee hovin College peng atanga DC Road Falkawn inkarah neih a ni. Hemi rual hian Govt. Champhai College Eco-Club member-te chuan ram hmul damdawi phun hnatlang College Campus-ah an nei bawk.

Hnatlang tura kalkhawm College Zirtirtu leh Zirlaite hmaah Bawrhsap chuan thu sawiin, faina leh changkanna a kalkawp tlat thu leh tipuitling thei turin a taka thawhchhuah a ngaih thu a sawi a. Champhai tui tlan ber Tuipui hnar leh Keilungliah luite thenfai hnatlang neih thin ni mahse, lui kawra hnawm kan paih reng si chuan thenfaiin awmzia a nei dawn lova, kan bal reng dawn a ni, a ti a. Kan vel luikawra hnawm paih thin sarang, rawng leh tawih theilo dangte kaltlangin chemical-te luiah luang lutin kan tui tlan a tibawlhhlawh thina, PHE thawktu te’n tihthianghlim hna thawkin natna thlentu thenkhat tifai bawk mahse chemical-te an tifai vek seng lova bawlhhlawh paih kawngah kan fimkhur hle a ngai a ni, a ti bawk.

District Water and Sanitation Committee Chairman ni bawk chuan kan tui tlana chemical awm ten taksaah harsatna a thlen theih dante sawifiahin, National Green Tribunal-in bawlhhlawh halral a remtih loh thu leh chumi dung zuia khapna thupek chhuah a nih thu sawiin, bawlhhlawh paihna tur hmun siamah chauh paih thin turin mipuite a chah a. Nakin lawka ram innghahna tur zirtlai rualte fai hnatlang nei tura phur taka an che chhuak chu hmuh nuam a tih thu sawiin, Champhai District nuam leh mawi tak chawinunga vawnghimtu nih tum theuh tura thawhpuiah a sawm nghal a ni.

Thusawitu dang Pu R.Lalnghakliana, Project Director, DRDA Champhai chuan sawrkar laipuia Ministry of Rural Development-in tuihna humhalh leh ruahtui dahkhawl ngaipawimawhin Jal Shakti Abhyan hnuaiah Catch the Rain Campaign a siam thu a sawi a. Faina leh tuihna humhalh kawngah theihtawp chhuah tlan a ngaih thu leh kumin March ni 22 atanga intan November ni 30 thleng awh tur Catch the Rain Campaign kalpui tum a nih thu pawh sawiin, April-March thla chhunga programme siam lawk hrang hrangte a tarlang bawk a ni.

Catch the Rain Campaign kaltlang hnawm hnawk thenfai hnatlang ‘Shram daan’ khuhhawnna program tawi Govt. Champhai College tualzawla neih hi Principal Pu P.Lalhmingliana chuan a kaihruaia, Pu R.Lalchhuanawma, NSS Programme Officer-in hnatlan dan tur a sawifiah hnuah fai hnatlang leh thingphun hnatlang neih chhunzawm nghal a ni a. College Zirlaite hian College peng atanga DC Road zawhin Falkawn thleng kawng dung leh a chhehvela hnawm paihte an chharfaia, UD&PA in an tum sak garbage bag lian 103 khat hnawm chharkhawmin an paih a ni. Eco-Club member te’n State Medicinal Plants Board Mizoram, Directorate of AYUSH, Aizawl kaltlanga ram hmul damdawi Hruivankai tiak 500 an dawnte chu College Campus-ah an phun a ni.

Ruahman dan chuan Catch the Rain Awareness Campaign kaltlang hian April thla leh May thla chawhma thlengin rally, seminar, workshop leh hnatlangte neih thin a ni ang.