Crime and Criminal Tracking Network and System (CCTNS) Data entry chungchang training hawnna programme vawiin khan SCRB Training Hall, Aizawl SP office-ah neih a ni a. Pu LH Shanliana, IGP chu khuallian a ni.

Crime and Criminal Tracking Network and System (CCTNS) hi National E-Governance Development Plan (NeGP) hnuaia Mission Mode Project pakhat a ni a. He project in a tum ber chu Information Technology hmanga Police Station hna hrang hrang tih changtlun a ni. Mizoramah CCTNS hi kum 2012 atanga tan niin, a hnuaiah hian Police Station 39 leh Higher Office 52 te network hmangin thlunzawm an ni a, hnathawh nan Core Application Software (CAS) Police Station tinah dah a ni bawk. He software hmang hian a hma a lehkha hmanga hna an lo thawh thin chu computer hmangin an thawk vek thei ta a ni. He software hmang hian State Data Centre ah Police Station hrang hranga an chhinchhiah te lakkhawm leh vek a ni a. Awlsam takin an chhinchhiah sa te chu a zawn chhuah zung zung theih phah bawk. State Data Centre-a dahkhawm an nih hnu in, National Data Centre, Pune, Hyderabad leh Delhi ah India ram State hrang hrang atanga record lo lut khawmte chu dahthat leh vek an ni a. Misual chhui kawngah te, rang taka file zawnchhuah te, case hrang hrang thlunzawm dan kawngah te he project hian nasa takin Police Department chu a pui chho zel a ni.

Mizoram CCTNS enkawl tur hian Police Station tin ten an hnuaia khawl leh data entry hna an kutah theuh a awm a. Amaherawhchu, uluk lehzual a kalpui duhna avangin, MPRO staff te a bik taka CCTNS enkawl tura dah tum a ni. Hemi atan hian a bik a training buatsaih a ni a, CCTNS khawl leh software enkawl dan zirtir tur an ni. Batch khatah mi 25 zel awmin, ni 5 chhung zel neih tur a ruahman a ni a, training pe tur hian SCRB leh CID Crime Cyber Cell mi leh sa te hman an ni bawk.Police Station te hna hi paper-less (lehkha ziak ngailo a computer hmang)-a hna thawh theihna hmun siam ngei tumin Police Department chuan hma a la zel a. CCTNS training hi tun mai nilo, nakin zelah pawh Police Staff te tan huaihawt chhoh zel tum a ni.

Attachment

  • Loading attachment...