143/2026-2027

Dated Serchhip, the 13th April, 2026 : Vawiin khan Serchhip District Bawrhsap Pu Paul L. Khuma chuan India ram chhiarpui ‘Census’ neih tan mek chungchangah Serchhip District MJA (Journalists) te press briefing a neihpui a. He hunah hian bial hrang hang viltu Census Charge Officer-te pawh an tel bawk.

Bawrhsap Pu Paul L. Khuma chuan kumin April ni 1, 2026 atanga Census hna hi tan a nih thu sawiin he chhiarpui hi 'Digital System' hmanga kalpui a nih tawh dawn thu a sawi a. “In tlawh kuala chhiarpui hna thawktu Enumerator-te’n, In tin an tlawh hunah, lehkhabu kalsan tawhin, Mobile App emaw, Tablet emaw hmangin, In dinhmun leh chanchinte an ziak lut tawh dawn a ni’ a ti. Census hi hlawm hnih (Phase)-a then a nih thu sawiin, Phase-1 (Houselisting & Housing Census) hi April - September 2026 chhung hian kalpui a nih tur thu leh, Phase-2 (Population Enumeration) chu February 2027 atanga tan a nih tur thu a sawi. CMMS Portal leh Census Website te hman tangkai a ni dawn a, mipuite tan April ni 15 thleng hian ‘se.census.gov.in’ ah mahni In dinhmun leh chhungkaw chanchinte zaihluh hna (Self-Enumeration) hi a tih theih dawn a; April ni 16 atanga May ni 15 chhungin Enumerator-ten in tin tlawh kualin, data lakkhawm hna an thawh tur thu a sawi bawk.

Bawrhsap chuan Enumerator-te tha taka lo dawngsawng tur leh mahni chanchin dik tak hrilh turin mipuite a ngen a. Census Act 1948 Section 11-na tlawhchhanin, chanchin dik lo petu leh thawktute ti buaitute chu hremna pek theih an nih thu a sawi bawk. Data dik lo pek hian sorkar hmasawnna ruahmanna a ti buai thei tih sawiin, mipuite thawhpuina leh tawiawmna ngenin briefing hi a khar a ni.

CENSUS CHUNGCHANGA MIPUITE HRIAT TUR PAWIMAWH : 

India ram pum huap inchhiarpui hi kum 1872 atanga chhiarin a vawi 18-na tur a ni a; kum 2021-a Covid-19 hri leng vanga neih theih loh a nih hnuah kum 16 hnuah neih leh tan a ni dawn a ni.

1. Data/Information dik pek a pawimawh: Census hi ram hmasawnna (Infrastructure, School, Hospital, etc.) ruahman nana hmanraw pawimawh ber a ni.

2. Data dik loin hmasawnna a ti thuanawp thei: Census-ah chanchin dik tawk lo kan pek chuan sorkar Scheme hrang hrang (Ration card, Housing, Health scheme) kan dawn turahte hmaih palh emaw, mipuite’n kan hmuh tur ang hmuh loh palh emawte a awm thei a, hei hian mimal leh khawtlang hmasawnna a ti thuanawp thei a ni.

3. Hremna: Census Act 1948 hnuaiah, chanchin dik hrilh duh lo leh dawt sawite chu Section 11 tlawhchhanin hremna (pawisa chawi emaw, lung in tan emaw) pek theih an ni.

4. Information kan pekte hi mipui hnena puanzar loh tur, thurk ‘confidential’ an ni: Census-a chanchin kan pekte hi mi dang tuma hnenah a chhuak dawn lo va, court-ah pawh finfiahna atan hman phal a ni lo.

5. Online Self-Enumeration: April 15 thlengin mahni In leh chhungkaw dinhmun, online-in (se.census.gov.in) ah ziah luh theih a ni a, hei hian Enumerator-te tan hna a ti samkhaiin, data dik tak lakkhawm kawngah nasa takin a pui dawn a ni.