Vawiin khan India ram chhiarpui result, Volume 1 Paper II chu Chief Secretary Pu Vanhela Pachuau-in I&PR Conference Hall ah a tlangzarh.

Kum 2011 India ram chhiarpui ah Mizoram a mihring cheng zawng zawng zat chu 1,091,014, mipa - 552,339 leh hmeichhia - 538,675 a ni a; mipa 1000 zelah hmeichhia 975 an awm a ni. Aizawl district chu mihring tamna ber niin 404,054 an cheng a, mihring tlemna ber Saiha district ah chuan 56,366 an cheng a ni.

Kum 2001 atanga Mizorama mihring punna hi 22.78% a ni a. Square km 1-ah mihring 52 zel cheng ang an ni. Naupang kum 6 hnuai lam zat chu 165,536 niin kum 2001 atanga naupang punna hi 15.17% a ni a. Mipa naupang 1000 zelah hmeichhe naupang 971 awm ang a ni.

Tun chhiarpui ah hian ziak leh chhiar thiam mi za zelah 91.6% niin India ram pumah Mizoram chu Pathumna a ni ta a. Serchhip district chu ziak leh chhiar thiam tamna ber niin 98.8% in ziak leh chhiar an thiam a. Literacy hniamna ber, Lawngtlai district ah ziak leh chhiar thiam 66.4% an awm a ni.

Chief Secretary chuan Mizoram ah naupang kum 6 hnuai lam sex ratio thlirin Mizoram-ah hmeichhe fa duh loh vanga nau paih a awm lo chu thil chhuanawm tak a ni, a ti a. Hmasang hun atangin India ramah Lal ram thenkhat ten chhiarpui an lo neih thin dan tarlangin Chief Secretary chuan British rorelna hnuaiah kum 1872 khan India ram chhiarpui hmasa ber chu neih a ni a. Chuta tang chuan kum 10 danah khel lova neih ziah a ni ta in tun tum chhiarpui hi Independence hnua India ram chhiarpui vawi 7-na a ni tih a sawi.

Kum 1901 atang Mizoram mihring pun chhoh dan hetiang hi a ni :
1901        -        82,434
1911        -        91,204
1921        -        98,406
1931        -        1,24,404
1941        -        1,52,786
1951        -        1,96,202
1961        -        2,66,063
1971        -        3,32,390
1981        -        4,93,757
1991        -        6,89,756
2001        -        8,88,573
2011        -        10,91,014