Vawiin chawhma dar 11.30 khan Aizawl-a cham mek Central Information Commission-a Chief Information Commissioner Pu Satyananda Mishra chuan I&PR Auditorium-ah Mizoram leh Central sawrkar hnuaia senior officer-te hnenah Right to Information (RTI) Act kalphung a sawifiah a. He inkhawm hi Chief Secretary Pu Vanhela Pachuau chuan a kaihruai a ni.

Pu Satyananda Mishra chuan India rama RTI Act lo pianchhuah dan sawifiahin, “Hun lo inher danglam zelah sawrkar leh mipuite inkarah thu kal lam leh haw lam inhriatpawh tawn lohna avangin rilru a lo inhlat tial tial a; chu chuan sawrkar rin lohna thinlung a lo hrin chhuah tak avangin sawrkar leh mipui inkara inpawhtawnna lei atan RTI Act chu duan chhuah a lo ni ta a ni” a ti. Central CIC chuan, “India rama RTI Act kan neih hi hetiang zula dan nei ve ram dang 90 velte aiin a huapzo a, a mawlmang zawk bawk a ni. Sawrkar thu engpawh, lehkhathem pakhata chhinchhiah leh vawn that chi reng reng chu miin RTI Act hmangin a zawtchhuak thiang a. India President te, Prime Minister te, Supreme Court atanga sawrkar inrelbawlna hnuaihnung ber thlengin a huam vek a ni “ a ti a. “Sawrkar hna kan chelh hian mi pawimawh leh thiltithei dinhmunah kan ding a; chu kan thiltihtheihna innghahna chu vantlang hriat ve phak loh thil tam tak vawngtu leh hretu kan nihna hi a ni a. Chu kan chanvo bil chu tunah chuan RTI Act hmangin mimir tan pawh zen tawm theih a lo ni ta a; hei hian mipuite kutah thiltihtheihna nasa tak a pek tak bawk avangin mipuiten sawrkar kan tihna leh hlauhna pawh a lo kiam ta a ni” Pu Satyananda Mishra chuan a ti. Mizoram chungchang bikah RTI Act hmanga zawhna lut a la tlem tham deuh chu chhan pahnih a awm theih thu Central CIC chuan sawiin, “Mizoram mipuite hi sawrkar lakah in lungawiin, zawh belh lehchuan tur in hriat loh vang a nih loh vek chuan, in lungawilohna zawhfiah dan kalhmang inhriat loh vang emaw, a nachang in hriat loh vang pawh a ni thei a. Tin, mipui in la tlem avangin sawrkar rorel leh thiltih apiangte chu a that leh that loh thu-ah chawplehchilhin mipui mar in dek nghal thei a; hei hian nasa takin sawrkar inrelbawlnaah kawngro a su thei a ni. RTI chungchanga mipuite chanvo leh a kalphungte hi nasa lehzuala inzirtir erawh uar sauh sauh a tul hle reng dawn a ni” a ti bawk.

Chief Secretary Pu Vanhela Pachuau pawhin thuhmahruai sawiin, “Mizoram mipuite hi kan la tlemin, khawtlangah kan inpawh em em a; chuvang chuan RTI hmang kher lo pawh hian sawrkar thu leh hla ril ber thlengin mipuiten kan hre zung zung thei thin hi ram dangte aia kan danglamna a ni a. Chuti chung chuan RTI hman tangkai dan hi inzirtir uar a tul a; zawhna zawh mai piah lamah, a chhanna kan dawn chu engtianga hman tangkai zui tur nge tih kan inkawhhmuh pawh a tul hle a ni” a ti.

Vawiin inkhawmah hian Mizoram Chief Information Commissioner Pu Lal  Dingliana chuan lawmthu sawiin hun hnung a khar a ni.