Central sawrkar-in Thingtlang mite hmasawnna tura ruahmanna thar a siam National Rural Livelihood Mission (NRLM) chu Mizoram ah kalpui a ni ve dawn ta a; Mizoram-a kalpui hmasak berna tur chu Kolasib District leh Serchhip District a ni. Kolasib District-a he Scheme in a tuam tur thil te enfiahin nimin tlai khan Pi Smitha Jacob Senior Concultant, Ministry of Rural Development, New Delhi chuan Khamrang a tlawh.

Hmasawnna Programme kal thin SGSY chu tih tawp a ni tawh dawn a, NRLM hian a thlak dawn a ni. He Scheme hnuaiah hian thingtlang khaw tina BPL chhungkua te chu huam tir vek tum a ni a, sawrkarin an eizawnnana an mamawh tur a tih sak ang a, anmahni-a sum an inpeipun theih nan tanpuina bakah Bank atanga Loan an lak theih dan tur a ruahman sak bawk ang.

NRLM hnuaiah chuan khaw tina Self Help Group (SHG) zawng zawng te chuan inthlunkhawmna an nei tawh ang a, an khua SHG inzawmkhawm te tan bungrua leh mamawh atana hman tur te a ruahman sak dawn a ni.

Nimina Khamrang a tlawhna ah hian Senior Consultant chuan Lawngthing Zau SHG te hnathawh dan zirchiangin hma an sawn dan te a thlirpui a. Mizoram ah NRLM hi hlawhtling taka a kal theih dan tur ngaihtuah zui a ni dawn a; Central India (India ram State dang) leh NE State (Tlangram) a he programme kalpui dan tur inanglo thei te pawh uluk takin a enfiah a ni.

Senior Consultant hi Pu Maria CT Zuali Project Director DRDA, Kolasib leh Pi Saizikpuii Sailo BDO Thingdawl bakah SIRD mithiam ten an tawiawm a ni.