1524/2025-2026

Dated Serchhip, the 19^th September, 2025: 145th Level D training nei mek Central Secretariat Service-a Section Officer te chuan vawiin khan Serchhip an lo thleng a. Serchhip DC Pu Paul L Khuma leh officer dangten lo dawngsawngin, DC Meeting Hall-ah vawiin tlai khan meeting an nei.

Training tura lo kal Section Officer te hi Central Secretariat, New Delhi-ah Under Secretary-a kaisang tawh tur an nih avangin training turin Mizoramah an lo chhuak a. Field visit te neiin hmun pawimawh hrang hrang te an tlawh dawn a.  September ni 15 khan lo thlengin group hnihah an inthen a. Group khat hian Serchhip District chhungah September ni 23 thleng an cham anga, Group pakhat dang hian Champhai District an tlawh thung dawn a ni.

Officer lo kalte hian Mizoram chhunga sawrkar laipui hmalakna an kalpui dan te, state sawrkar leh District inrelbawl dan kalphung te, mipui mimir zinga a tha zawng leh tha lo zawnga nghawng a neih dan te, Mizo culture leh history te, leh tul dang pawimawh apiang an rawn zir dawn a.  Vawiin DC hoa meeting-ah hian DRDO, PHE, PWD, DEO, Agriculture, Horticulture leh Industries officer te an tel a. Central Scheme hrang hrang Serchhip District-a an kalpui dan inhrilhhriatna hun an hmang a ni.

Section Officer te hian Serchhip District an cham chhungin Thenzawl leh East Lungdar an tlawh dawn bawk a ni.