Central Silk Board bultumin vawiin khan Aijal Club-ah Resham Krishi Mela neih a ni a. He programme-ah hian maimaw pangang khawitu farmer te leh technical lama mithiamten hetiang lam hawi inzirtirna leh hmalak zel dan tur an sawi hova. Sericulture Minister Pu Nihar Kanti Chakma chuan a hmanpui a ni.

Minister chuan Mizoram sik leh sa leh leilung awmdan hi silk pangang khawinan a inhmeh hle a, silk pangang chaw pui ber thingtheihmu pawh a tha duhin tualto thingtheihmu hmuh tur a tam hle tih Central Silk Board Scientists Mizoram tlawha lokal te pawhin an pawmpui thu a sawi a. Sericulture lamah Mizoramin hma a sawn tih sawiin Research Extension Centre pawh thingtheihmu atan bik Central Silk Board-in Aizawlah an dah a ni, a ti. Sericulture lama Mizo mipui te hmasawnna rahbi tukna atan thil pawimawh tak, Sericulture field Research Station Mizorama dah pawh thil tul tak nia a ngaih thu Pu Nihar Kanti Chakma chuan a sawi bawk. Minister chuan khawvel pum huap pawha silk la hmang hnem ber chu India ram a ni a, cocoon hralhna leh silk la hralhna chu engtik lai mahin a harsa ngailo a ni tih sawiin Mizoram pum huap pawh a NLUP trade hrang hrang ti tha ber thlan chhuah naah pawh 2 na hauh tu chu maimaw pangang khawitu a ni, a ti. Cocoon Grade A Kg 25 a rit hian cheng 5000 a man a, pangang chaw ei thin thingtheihmu, bul, nauthak leh a dangte hi kum 40 chuang dam thei vek an nih hlawm avangin tu leh fate thleng tan pawha rotling tak tak an ni, Pu Chakma chuan a ti bawk.

Sericulture Secretary Pu C Lalthankhuma chuan pangang khawi thiam leh hlawhtling tak tak tur chuan department lam mithiamte thurawn leh zirtirna zawm a pawimawh ber fo a ni, a ti.

He hun hmanpui tura lokal CSR &TI, Berhampore, West Bengal-a Director Dr BB Bindroo, Zozia Silk Industry neitu Pi Laltanpuii, Sericulture Director Pu D Engzananga te pawhin maimaw pangngang khawitu te tana hriattur thil tangkai leh pawimawh tak tak an sawi a ni.

Resham Krishi Mela hi nilenga neih niin chawhnu lamah Sericulture Deputy Director Pu Lalrinmawia kaihhruaiin Technical session hun an hmang a. He hun hmang tur hian RSRS Jorhat atangin Scientist M Shankar pawh a lo tel a ni.