Central YMA leh PHE Department tangkawp chuan naktuk (14.3.2014) khian Khawruhlian Community Hall-ah Chalfilh tlang leh a chhehvel khuate tan tuihna humhalh beihpui chungchangah inzirtirna a buatsaih dawn a. Khaw 15 atangin mi 300 vel tel tura beisei an ni.

He hun hi chawhma dar 10:30-ah a hawnna hun neih a ni ang a, Pu Laldawngliana, Vice President, Chalfilh Group YMA in a kaihruaitu a ni ang a, Er. Lalmuanzova, Chief Engineer, Zone-I, PHED chu khuallian a ni ang. He hunah hian YMA leh PHE Department atangin thuchah tawi ngaihthlak a ni ang a, mit leh beng fah thei tur thil pawimawh tak tak chhuah a ni bawk ang. Chawhnu lamah Technical Session neih zui a ni ang a, Er. Lalrinzuala Ralte, EE, PHED-in a kaihruai ang a, Er. H. Duhkima, SE, PHED te, Pu Lalrinmawia Sohnel, CEC, CYMA leh Er. Lalrothanga, Director, CCDU, PHED-te'n thusawina hun an nei ang.