2201/2023-2024

Aizawl, the 6th October, 2023: Vawiin chawhnu dar 3 khan Chief Electoral Office, Mizoram hnuaia Media Cell chuan Pu H.Lianzela, Addl. CEO kaihhruaiin a Office Chamber, MINECO ah meeting an nei.

Addl. CEO Pu H.Lianzela chuan election puan a nih veleh tul angte bawhzui thuai a ngaih dawn avangin lo inhmakhua lawk vek tul thu a sawi a. Inthlanna felfai tak neih a nih theih nan election kaihhnawih mipuite hriat tulte media hrang hrang kaltlanga puan chhuah zung zung a pawimawh thu a sawi bawk.

He hunah hian inthlan puan a nih veleha Media Cell anga chetlak dan tur hrang hrangte sawiho a ni a. ECI in election a puan hnuah Press Conference koh nghal thuai a ngaih dawn thu leh hemi tura inpuahchah lawk tulte sawiho niin, mawhphurhna hrang hrangte siam a ni a. Vote tla a that theih nan SVEEP awareness campaign kalpui kawnga pawimawhte pawh sawiho a ni bawk.