2401/2023-2024

Aizawl, the 20th October, 2023: Vawiin chawhnu dar 12:30 khan November ni 7, 2023 a Mizoram MLA inthlanpui neih tur chungchanga inpuahchahnate Chief Electoral Officer (CEO) Mizoram Pu Madhup Vyas, IAS kaihhruaiin CEO Office-ah thirlho a ni. 

Chief Electoral Officer Pu Madhup Vyas chuan election langtlang, felfai leh hlawhtling taka buatsaih a nih theih nan thawhhona tha tak chhawmnun zel a tul thu leh hmalaknate inhriatpawh tawn zel a tul thu a sawi a. Election chu thil dang zawng aia ngaihpawimawh hmasak tur a nih thu leh inpuahchahna tithuanawp thei thilte awm lo tura tanlak tlan a tul thu a sawi a. Inthlan kaihhnawiha inhnamhnawih zawng zawngte theihtawp chhuah zel turin a chah a ni. 

He hunah hian kumin inthlanpui lo awm tur atana Sawrkar Department hrang hrangte inbuatsaihna leh hmalakna hrang hrangte thlirho niin, hmabak la awmte hun bituk chhung ngeia zawh hman a nih theih nan tanlak ni se tih a ni a. Mizoram chhunga Assembly Constituency 40 ah Polling Station 1,276 a awm thu tarlan niin, hmanraw mamawh leh awm ngei ngei tura tih Assured Minimum Facilities (AMF); electricity, inthiarna, tui in tur, wheelchair lawn theihna (ramp) leh furniture chhawpchhuah kawnga hmalaknate thirlho a ni a. October ni 17, 2023 thleng khan hengte hi Mamit, Aizawl, Saitual, Khawzawl, Kolasib, Champhai leh Hnahthial District-ahte ruahman fel tawh a nih thu tarlan a ni a; District danga hmalak ngai la awmte pawh chak zawka bawhzui ni se an ti bawk. 

Heng bakah hian Polling Official leh Central Armed Police Forces (CAPF) personnel-te veivah zung zung theihna tura inkalpawhna siam that ngai te, emergency air ambulance ruahman dan tur te, sum dinhmun tlangpui leh Dan leh thupek kenkawh chungchang te, Vohbik (PwD) te tana benchmark disability certificate pek chhuah leh CAPF tana ruahmanna siamte thlirho a ni bawk a. Tun dinhmunah PwD voter 3,300 awm zingah benchmark disability certificate pek chhuah 691 an awm thu leh CAPF Company 20 te'n Mizoram an rawn thlen tawh thu tarlan a ni a, ruihhlo leh a kaihhnawih man chungchanga hmalak dante pawh thlirho a ni bawk. He hunah hian Addl. CEO -I Pu H. Lianzela, Addl. CEO -II Pu Amol Srivastava, Joint CEO Pu James Lalnunmawia leh Department kaihhnawih hotute an tel a ni.