Pu John Rotluangliana, Minister FCS &CA, Transport, & Tourism, Bialtu MLA ni bawk chuan Dt 13-15 April, 2016 chhung khan a bial chhung khaw hrang hrang Hruaitluang (Teirei Forest), Tuipuibari, Andermanik, Rajiv Nagar leh Damparengpui khua te a tlawh.

Dt 14 zan 7:00 Pm khan Young Chakma Association ten an buatsaih 3rd Bizu Miloni 2016 Andermanik khua neih chu khuallian niin a hmanpui a, Pu John Rotluangliana chuan Bizu hmangtu zawng zawngte chu duhsakna chibai bukin hlim taka Bizu hmang turin duhsakna a hlan a ni. Pu Genandu Chakma President Young Chakma Association in a tarlan danin Bizu Milloin Festival hi kumtin vawi khat hman thin a ni a, Chakma Traditional Festival lian ber niin ni thum chhung hman thin a ni, he festival ah hian sakhua bik sawi lovin chakma hnam zawng zawng huap a hman thin a ni, In tinnin eitur tuihnai thei ang bera siamin in leh a vel te uar takin an chei thin a, thiantha te lengah sawmin duhsakna an in hlan tawn thin a ni. A hma chuan mahni khua theuhva hman thin a ni a, kum 3 kalta a tang khan Rajiv Nagar I leh II, Andermanik, Khantlang leh Belkhai khua te chuan a huhovin an hmang ta a ni.

Food & Supply Minister hian a bial chhung khaw hrang hrang a tlawhna ah hian a mah lo lawmtute hma-ah thusawiin Sorkar hmasawnna leh hmachhawp hrang hrang te a tarlang a tun dinhmunah Mizoram chu buhfai ah kan hnianghnar thu leh Food Security kan hman a vanga Ration Card siamthat a nih avanga hming dik lo leh kum diklo te chu April thla chhunga siam that vek a ni ang a ti, hming leh kum dikloh avang hian kan buhfai lak theih zat turah buaina a awm loh thu a sawi bawk Teirei Forest khua ni thin chu Sorkar pawmpuina in bialtu Minister hian Hruaitluang khua ti a thlak a nih thu leh khaw hming thar puanna a nei nghal bawk a ni. Pu John Rotluangliana Minister FCS&CA, Transport Bialtu MLA ni bawk hian Mamit Bazar venga Pa eisual a vanga chhiat tawk ta Pu Saikhuma (L) te chhungkua chu thinlung taka a tawrhpui thu a sawi a, Mamit Welfare te hmalakna chu fakawm a tih thu a sawi bawk