Joint Electricity Regulation Commission (JERC – For Manipur & Mizoram) leh Champhai Power Circle, P&E Department tangkawpin vawiin khan Champhai Kahrawt YMA Hall-ah “Workshop on Electricity Consumers’ Awareness” buatsaih a ni a. Pu A. Chhuanmawia, IDES (Rtd), Chairperson, JERC (M&M) chuan Electricity Act, 2003 hnuaia mipuiten an chanvo leh mawhphurhnate an hriatchian zawk nan he hun hi buatsaih a nih thu a sawi a ni.

Vawiin workshop hi Pu Richard Zothankima, Asst. Secretary, JERC (M&M)-chuan a kaihruai a. Er. Lalchharliana Pachuau, Chief (Engg), JERC (M&M) atangin Supply Code chungchang ngaihthlak a ni a. Kawlpetha pawttuten an hriattur pawimawh hrang hrang leh dan leh dunte a tarlang a ni. Er. H. Thanthianga, Asst. Chief (Engineering), JERC chuan power man bithliah dan kalphung hrilhfiahna hun a hmang a. Kumtina power mamawhna a pun zel avang leh thildang man kumtina sang chho zel mil a power sector enkawlna sum sen a tam zel avangte, luangral lo awm thinte leh thildang hrang hrang vangin kawlpetha pawh man a to chho zel a ni, a ti a. Chutihrual chuan Sorkarin a man tlawmin mipui hnenah kawlpetha a pek avangin thenawm state te ai chuan kawlpetha manah mipuiin kan la sen tlem thu tarlangin, Sorkarin unit khatah consumer-te Rs. 4.79 (53%) zelin a pek sak a ni, a ti.

Mizoramin power kan siam leh hrahchhuah chungchang leh, pekchhuahna kawnga luangral awmzatte bakah Champhai Power Division hnathawh tlangpui te Pu David C. Zahmuaka, SE, P&E, Champhai atangin ngaihthlak a ni bawk a. Chhinchhiahnaa a lan danin kum 2013-2014 chhung khan Champhai Power Division (Champhai Town & Champhai Rural Areas) chhungah consumer 14,885 an awm a, chawhrualin thla khata 76.50 unit zel consumer khatin a hmang tihna a ni.

Awareness programme-ah hian Sorkar department office hrang hranga thawkte leh College leh High School zirtirtu leh naupangte bakah tlawmngai pawl hrang hrangte an kalkhawm a. Zawhna leh chhanna hun tha tak hman bawk a ni.