Vawiin chhun dar 11:00 khan I & PR Conference Hall CHANEM ah Champhai Bawrhsap Pu Sangdingliana, IAS hovin Champhai a India Independence Day vawi-68 na lawm dan tur Sawrkar department leh Tlawmngai pawl hrang hrang ten an rel.

Champhai Khawpui chhunga sawrkar department leh Zirna In hrang hrangte mawhphurhna leh chanvo pek an ni a, Independence Day lawmna hmun atan hian Chhangphut Field a ni ang a, zing dar 10:30 ah tan tur a ni ang, Khuallian tur chu sawrkar ruahman rin tur a ni. Kumdanga tih thin Chhangphut field a lime marking siam thin chu astro turf phah anih tak avanga a remchan dawn tak loh avangin Nylon hrui rawng lar deuha marking tih tura ruahman a ni.

Independence Day pual hian infiamna lamah Football leh Volleyball tournament te buatsaih a ni ang a. Ceremonial parade /March Past turin Armed Forces leh High School zirlai te ruat an ni.

Vawiin meeting hi an kal tha hle a, Chairman Pu Sangdingliana, D.C chuan kalkhawmte chu lawmthu hrilhin khawtlang mawi nan an mawhphurhna theuh te tha taka tihlawhtling theuh turin a chah a ni.