Hmun dangte rualin vawiin khan Champhai Chhangphut Field-ah Rualbanlote Ni pualin International Day for Differently Abled Celebration chu Champhai District SSA leh Social Welfare Department-te tangkawp buatsaihin hman a ni.
He Rualbanlote Ni hmanna hun hi Champhai District SSA Deputy DPC Pu H. Lalhminghlua'n kaihruaiin, Champhai SDO (Sadar) Pu Pachhunga, CDPO Pu Lalbanglova leh SSA DPC Pi K. Lalsiamliani ten he Ni hman anih chhan leh pianphunga rualbanlo (vohbikte) dinhmun leh endawng lova chhawmdawl an tul thu an tarlan bakah nunkhawnuam an hman ve theihna tura an dikna chanvo humhalh anih dante an sawilang a.
Champhai leh a chhehvel a puitling leh naupang rualbanlote punkhawmin, anmahni intih hlimna tur infiamna chi hrang hrang: Puitling leh naupang puala intlansiak, inhruipawh, balloon inrahkeh siak leh football khela inelna neihtir an niin, nileng a hun hman a ni a. Rualbanlo thahnem tak hnenah silhpuan pek anih bakah intihhlimna a chanvo neite hnenah lawmman pek a ni bawk.
